АҚШда қор бўрони сабаб қарийб 300 минг киши электрсиз қолди

АҚШ шимоли-шарқида кузатилган кучли қор бўрони оқибатида чорак миллиондан ортиқ уй ва корхоналар электр энергиясисиз қолди, деб хабар беради Reuters.

Агентлик маълумотларига кўра, Нью-Йорк штатидаги 190 мингдан ортиқ уй ва корхоналар, Пенсильванияда эса 47 минг хонадон электрсиз қолган. Бундан ташқари, Мен ва Вермонт штатларида энергетика компанияларининг 32 минг мижози ҳам электр таъминотидан узилган.

Таъкидланишича, кучли қор бир неча кундан буён давом этмоқда, айрим қирғоқбўйи ҳудудларда кучли тўлқинлар сабаб сув тошқинлари кузатилган. Қор бўрони бошлангани ҳақда АҚШнинг шимоли-шарқий штатлари аҳолиси огоҳлантирилган.

Нью-Йоркдаги National Грид энергетика компанияси ўз баёнотида бригадалар етказилган зарарни баҳолаб, шикастланиш ҳолатларини бартараф этаётганини маълум қилган. «Кучли нам қор давом этмоқда ва шамол Нью-Йоркнинг марказий, шарқий ҳамда шимолий қисмларида кенг кўламли фалокатларни юзага келтирди», — дейилади баёнотда.

АҚШ Миллий метеорология хизмати (NWS) Пенсильвания, Вермонт ва Нью-Йоркка яна бир неча сентиметр қор ёғишини маълум қилган. Шунга қарамай, агентлик маълумотларига кўра, қор тўпланиши қисқа вақт давом этади ва дам олиш кунлари ҳаво ҳарорати 10 даражадан кўтарилади.

Эслатиб ўтамиз, январь охирларида АҚШга кучли қор бўронлари ёпирилаётгани сабабли 5 мингга яқин авиарейсларнинг бекор қилинганди.