“Milan” hujumchisi Zlatan Ibrahimovich mavsum so‘ngida faoliyatini yakunlash borasida o‘ylamoqda.
Shvetsiyalik forvard hali kelajagi borasida bir qarorga kelmagan, biroq oxirgi paytlarda ko‘p jarohat olayotgani bois faoliyatini tugatish haqida o‘ylamoqda. Agar “Milan” joriy mavsum Italiya chempionligini qo‘lga kiritsa, u holda hujumchi katta ehtimol bilan faoliyatini yakunlaydi.
Ibrahimovich 23 yillik faoliyati davomida 559 ta gol urgan.
Zlatan 2021/22-yilgi mavsum “Milan” safida 23 ta o‘yin o‘tkazdi va 8 ta golga mualliflik qildi. “Rossonerilar” A Seriyada 31 turdan so‘ng 67 ochko bilan 1-o‘rinda bormoqda.
Avvalroq Zlatan Shvetsiya Jahon Chempionatiga chiqa olmagan bo‘lsa ham terma jamoadan ketmasligini ma’lum qilgandi.
Hujumchining milanliklar bilan amaldagi shartnomasi yozda o‘z nihoyasiga yetadi. Avvalroq klub Zlatanga yangi, bir yillik shartnoma tayyorlayotgani, unga ko‘ra futbolchining maoshi 7 mln yevrodan 2 mln yevroga tushishi haqida xabarlar paydo bo‘lgandi. Shuningdek, kelishuvda futbolchining klub direktori lavozimiga o‘tishi ko‘zda tutilgani ham aytilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)