Qashqadaryo viloyatining Koson tumanida bosh shifokor qo‘l ostidagi xodimlarini obodonlashtirish ishlariga jalb qilgani uchun jarima to‘laydigan bo‘ldi. Bu haqda Bandlik va mehnat munosabatlari vazirligi xabar berdi.
Ma’lum qilinishicha, Koson tuman tibbiyot birlashmasining diagnostika bo‘limi boshlig‘i bo‘lim tahlilchilari va boshqalarni birlashma hududiga obodonlashtirish ishlariga jalb qilib, xizmat vazifasiga kirmaydigan ishlarga majburlagan. Shu sabab u Ma’muriy javobgarlik to‘g‘risidagi kodeksining 51-moddasi 1-qismi (mehnatga biron-bir shaklda ma’muriy tarzda majburlash) ga asosan jarimaga tortilgan.
Avvalroq Qarshi tuman tibbiyot birlashmasining reanimatsiya bo‘limi boshlig‘i bo‘limda faoliyat yurituvchi hamshira va orastabonlarni tuman tibbiyot birlashmasi hovlisini tozalashga majbur qilgani uchun Ma’muriy javobgarlik to‘g‘risidagi kodeksining 51-moddasi 1-qismi (mehnatga biron-bir shaklda ma’muriy tarzda majburlash)ga asosan jarimaga tortilgandi.
Koson tumanidagi holat viloyatda so‘nggi 15 kundagi ikkinchi holat hisoblanadi.
Mazkur vaziyatga munosabat bildirgan viloyat sog‘liqni saqlash boshqarmasi axborot xizmati esa shifokorlarning majburiy mehnatga jalb qilinganini tasdiqlab, “gul ko‘chatlari uchun pul yig‘ilgani haqidagi ma’lumotlar tasdiqlanmadi”, deydi.
Izoh (0)