Andijon viloyati Izboskan tumanidagi maktablardan birida o‘qituvchi darsga kech qolib kelgan o‘quvchiga ikki litr ariq suvidan ichirib jazoladi, deb xabar berildi “Zamon” informatsion dasturida.
Aytilishicha, 6-sinf o‘quvchisi darsga kechikib kirgan va o‘qituvchiga qo‘pol muomalada bo‘lgan. O‘qituvchi esa uni 2 litr ariq suvi ichirib, nok bargini yeyishga majburlagan.
“O‘sha kun maktabda navbatchi sifatida eshik tagida o‘tirgan edim. U o‘quvchi 2-soat oxiriga kech qolib keldi. Sababi so‘ralganda gap qaytardi. O‘zimning qarindoshim ekani sababli unga o‘zingni bos degan maqsadda 100 gramm yoki bir piyolacha suv ichirganman. Bu yerdagi boshqa gaplar qayerdan kelyapti, buni bilmayman. Nok daraxti bor, lekin bunaqa narsa qilinmagan. Masalan, o‘shani o‘quvchiga majburlab bersa ham, yutmaydi-da u narsani. Men majburlay olmayman-ku, to‘g‘rimi? Bu narsani aytishdan oldin sal o‘ylash kerak”, — degan o‘qituvchi.
Qayd etilishicha, darsga kechikkan o‘quvchi B. va uni jazolagan domla Sh. o‘zaro qarindosh bo‘lgan. Voqeaga jabrlanuvchining sinfdoshlari ham guvoh bo‘lgan.
“Hamma bir-biriga suv sepib o‘ynayotgandi. Domla ‘mana shu suvni ichasan’, deb ichirib yubordi. U (jabrlangan o‘quvchi — “Daryo” izohi) suv sepmagandi, o‘sha payt dalada ish qilib kelayotgan ekan”, — degan o‘quvchilardan biri.
“Kechirim so‘rattirib, doktorga olib boramiz dedi. O‘zi olib ketdi shifoxonaga. U yerda shifokorlar hech qanday muolaja shartmasligini, yaxshi bo‘lib ketishimni aytdi”, — deydi jabrlangan o‘quvchi.
Eslatib o‘tamiz, Andijondagi maktablardan birida o‘qituvchi o‘quvchi qizni kaltaklagandi, o‘quvchi qiz esa o‘zini himoyalash uchun o‘qituvchiga qarshilik ko‘rsatgan. Keyinchalik kaltaklangan o‘quvchi qizlar voqea sababi haqida gapirib bergan. Qayd etilishicha, sinf rahbari darsga kech qolgan, shu sabab bolalar maktabdan ketib qolgan.
Avvalroq Sirdaryoda maktab o‘quvchisining yaqinlari direktor o‘rinbosari va o‘qituvchini kaltaklagani aytilgandi.
Izoh (0)