Toshkentda janjallashgan o‘quvchilarning ota-onasi javobgarlikka tortildi

Internetda ikki maktab o‘quvchilari o‘rtasidagi janjal aks etgan video tarqaldi. Mazkur holat bo‘yicha Toshkent shahar IIBB ma’lumot berdi.

Qayd etilishicha, 2022-yilning 15-aprel kuni, taxminan, soat 15:00 da Mirobod tumanida 14 yoshli I.B. 14 yoshli D.N. (jabrlanuvchi)ga qo‘ng‘iroq qilib, muloqot chog‘ida o‘smirlar o‘zaro janjallashib qolgan.

I.B. mazkur holatga oydinlik kiritish maqsadida voyaga yetmagan D.N. bilan “Yuksalish” mahallasi hududida uchrashishgan va janjallashib ketgan. Oqibatda D.N.ga tan jarohati yetkazilgan.

Holat bo‘yicha hujjatlar rasmiylashtirilgan va ota-onalar Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan ma’muriy javobgarlikka tortilgan.

Bundan avval Qashqadaryoda YPX xodimi bilan janjallashgan Nexia yo‘lovchisi 10 sutkaga qamalgani, Toshkentda Spark yo‘lini to‘sib qo‘ygan Matiz haydovchisi kaltaklangani hamda Namanganda 16 yoshli bola tengdoshini pichoqlagani haqida xabar berilgandi.