Ijtimoiy tarmoqlarda Toshkent shahri Chilonzor tumanida noma’lum shaxs Cobalt avtomashinasida bolalar bilan o‘ynayotgan kuchuk bolasini urib ketgani haqida xabarlar tarqaldi. Shahar Ichki ishlar bosh boshqarmasi holat bo‘yicha ma’lumot berdi.
Qayd etilishicha, Chilonzor tumani IIBga ayol (43 yoshli) ariza bilan murojaat qilib, 12-aprel kuni soat taxminan 18:00 da noma’lum erkak o‘z avtomobilida jonivorni bosib ketganini ma’lum qilgan. So‘ng ushbu shaxs voyaga yetmagan bolalarning ko‘z oldida o‘z harakatlarini davom ettirib, Cobalt avtoulovida noma’lum tomonga harakatlanib ketgan. Holat guvohi bo‘lganlar mashina raqamini tasvirga olishga ulgurmagan.
Ayni vaqtda jonivorga ozor yetkazgan shaxsga nisbatan qonuniy chora ko‘rish uchun tergovga qadar tekshiruv ishlari olib borilmoqda.
Avvalroq Toshkent viloyatida itini “Jiguli” tomidagi yukxonaga bog‘lab harakatlangan haydovchi sudga berilgandi. Shuningdek, Toshkentda itni o‘ldirib, vannaga osib qo‘ygan erkak 2,5 mln so‘m jarimaga tortilgani va Qashqadaryoda yosh bola ko‘z o‘ngida eshaklarni kaltaklagan ota 12 sutkaga qamalgani xabar qilingan.
Izoh (0)