Yangi yo‘l harakati qoidalarida yuk avtomobillari yo‘lning faqat o‘ng qismidan harakatlanishi shartligi belgilandi. Bu haqda 15-aprel kuni bo‘lib o‘tgan davra suhbatida IIV JXD YHXX boshlig‘i o‘rinbosari Erali Bozorov ma’lum qildi, deya xabar bermoqda “Daryo” muxbiri.
Erali Bozorovning aytishicha, avvalgi tartibda barcha transport vositalari uchun harakatlanish bir xil bo‘lgan. Ammo bu qoida yaxshi natija bermagan.
“Hammamiz yo‘lda yuramiz. Yurayotganda trassalarda M39 yoki vodiyga ketishda e’tibor bersangiz, yuk avtomobillari chap qatorni egallab olib, hech kimga yo‘l bermaydi. U yerda tez tibbiy yordam mashinasi yoki boshqa shoshayotganlar bo‘ladi. Lekin ular mana shu trassalarda belgilangan tezlikda (juda ham sekin), ya’ni yo‘lni to‘liq egallab olgan holda harakatlanadi. Bunga hammamiz guvoh bo‘lganmiz. Lekin shu kunga qadar ularga chora ko‘rishning iloji yo‘q edi. Endilikda agar shunday qilinsa, qonunga muvofiq chora ko‘rilishi yuzasidan targ‘ibot ishlarini olib boramiz”, — dedi u.
IIV JXD YHXX bo‘lim boshlig‘i Murod Sheraliyevning qo‘shimcha qilishicha, yuk mashinasiga chap tomonga harakatlanishiga istisno holat ham bor.
“Transport vositasi chapga qayrilmoqchi bo‘lsa, yo‘l harakati qoidalari bo‘yicha chap qatorni egallashi kerak yoki orqaga qayrilib olish uchun chap qatorni egallashi lozim. Shu qoida istisno tariqasida ko‘rsatilgan. Bundan tashqari vaqtda yuk avtomobillarining barchasi oxirgi o‘ng tasmadan harakatlanishi kerak”, — dedi tashkilot rasmiysi.
Muloqotda yo‘l qoidalarida belgilangan transport vositalarini qayrilib olish joylarida va unga 30 metr yetmasdan to‘xtash ta’qiqlanishi haqidagi band bo‘yicha ham izoh berildi.
“Ayrim joylarda ikki qatorli yoki bir qatorli yo‘llarimiz bor. Misol uchun, “Osiyo” to‘yxonasi, “Anhor” parkning oldi. Mashinani qayrilish joylariga qo‘yib ketishadi. Qayrilishga kelgan transport vositasi 2-3-marta manyovr qilib, keyin qayrilishiga to‘g‘ri keladi. Uni buyoqda mashinalar kutib qolyapti. Oqibatda tirbandliklar hosil bo‘lib, harakatlanish cheklanmoqda. Shuni inobatga olgan holda qayrilib olish joylaridan o‘tib 30 metr yoki ungacha yetmasdan 30 metrda transport vositalarini qo‘yish ta’qiqlanadi. Nega bunday bo‘ldi, desak, transport vositalarimizni to‘liq xavfsiz harakatlanishi hamda qayrilib olishdagi transport vositalariga xalaqit bermaslikni ta’minlash ko‘zda tutilgan”, — dedi Murod Sheraliyev.
Avvalroq haydovchilik guvohnomasi qanday hollarda talab etilishi ma’lum qilingandi. Shuningdek, yangi yo‘l harakati qoidalarida haydovchilarga me’yoridan ortiq balandlikda musiqa tinglash va signal chalish taqiqlangani bildirilgan.
Izoh (0)