Янги йўл ҳаракати қоидаларида юк автомобиллари йўлнинг фақат ўнг қисмидан ҳаракатланиши шартлиги белгиланди. Бу ҳақда 15 апрель куни бўлиб ўтган давра суҳбатида ИИВ ЖХД ЙҲХХ бошлиғи ўринбосари Эрали Бозоров маълум қилди, дея хабар бермоқда «Дарё» мухбири.
Эрали Бозоровнинг айтишича, аввалги тартибда барча транспорт воситалари учун ҳаракатланиш бир хил бўлган. Аммо бу қоида яхши натижа бермаган.
«Ҳаммамиз йўлда юрамиз. Юраётганда трассаларда М39 ёки водийга кетишда эътибор берсангиз, юк автомобиллари чап қаторни эгаллаб олиб, ҳеч кимга йўл бермайди. У ерда тез тиббий ёрдам машинаси ёки бошқа шошаётганлар бўлади. Лекин улар мана шу трассаларда белгиланган тезликда (жуда ҳам секин), яъни йўлни тўлиқ эгаллаб олган ҳолда ҳаракатланади. Бунга ҳаммамиз гувоҳ бўлганмиз. Лекин шу кунга қадар уларга чора кўришнинг иложи йўқ эди. Эндиликда агар шундай қилинса, қонунга мувофиқ чора кўрилиши юзасидан тарғибот ишларини олиб борамиз», — деди у.
ИИВ ЖХД ЙҲХХ бўлим бошлиғи Мурод Шералиевнинг қўшимча қилишича, юк машинасига чап томонга ҳаракатланишига истисно ҳолат ҳам бор.
«Транспорт воситаси чапга қайрилмоқчи бўлса, йўл ҳаракати қоидалари бўйича чап қаторни эгаллаши керак ёки орқага қайрилиб олиш учун чап қаторни эгаллаши лозим. Шу қоида истисно тариқасида кўрсатилган. Бундан ташқари вақтда юк автомобилларининг барчаси охирги ўнг тасмадан ҳаракатланиши керак», — деди ташкилот расмийси.
Мулоқотда йўл қоидаларида белгиланган транспорт воситаларини қайрилиб олиш жойларида ва унга 30 метр етмасдан тўхташ та’қиқланиши ҳақидаги банд бўйича ҳам изоҳ берилди.
«Айрим жойларда икки қаторли ёки бир қаторли йўлларимиз бор. Мисол учун, «Осиё» тўйхонаси, «Анҳор» паркнинг олди. Машинани қайрилиш жойларига қўйиб кетишади. Қайрилишга келган транспорт воситаси 2-3 марта манёвр қилиб, кейин қайрилишига тўғри келади. Уни буёқда машиналар кутиб қоляпти. Оқибатда тирбандликлар ҳосил бўлиб, ҳаракатланиш чекланмоқда. Шуни инобатга олган ҳолда қайрилиб олиш жойларидан ўтиб 30 метр ёки унгача етмасдан 30 метрда транспорт воситаларини қўйиш та’қиқланади. Нега бундай бўлди, десак, транспорт воситаларимизни тўлиқ хавфсиз ҳаракатланиши ҳамда қайрилиб олишдаги транспорт воситаларига халақит бермасликни таъминлаш кўзда тутилган», — деди Мурод Шералиев.
Аввалроқ ҳайдовчилик гувоҳномаси қандай ҳолларда талаб этилиши маълум қилинганди. Шунингдек, янги йўл ҳаракати қоидаларида ҳайдовчиларга меъёридан ортиқ баландликда мусиқа тинглаш ва сигнал чалиш тақиқлангани билдирилган.
Изоҳ (0)