“Qo‘lingizda qog‘oz polis bo‘lsa, ‘prava’ni olib yurishingiz kerak” — haydovchilik guvohnomasi qanday hollarda talab etilishi ma’lum qilindi

Yangilangan yo‘l harakati qoidalarida haydovchining yonida biometrik pasport yoki ID-karta bo‘lsa, undan “prava” va boshqa hujjatlar talab etilmasligi, Yo‘l-patrul xizmati xodimi uning boshqa hujjatlarini planshet orqali tekshirishi belgilangan. Lekin ba’zi hollarda planshet orqali izlangan ma’lumotlar topilmay qolmoqda. Buning sababi haqida 15-aprel kuni bo‘lib o‘tgan davra suhbatida IIV JXD YHXX boshlig‘i o‘rinbosari Erali Bozorov ma’lumot berdi, deya xabar qilmoqda “Daryo” muxbiri.

Erali Bozorovning aytishicha, transport vositalari egalarining fuqarolik javobgarligini majburiy sug‘urta qilish bo‘yicha sug‘urta polisi planshet orqali tekshirilganda topilmasa, hujjat axborot tizimiga kiritilmagan bo‘ladi.

“2022-yil 1-apreldan boshlab haydovchi yonida ID-karta yoki biometrik pasporti bo‘lsa, ta’kidlab o‘tilgan hujjatlarni olib yurishi shart emas, ular tizim orqali tekshiriladi. Ammo ayrim sug‘urta polislari 1-aprelga qadar bazaga kiritilmagan. Sug‘urta kompaniyalarida polis tizimi ishlab chiqilgan. Lekin bunga qadar polislar qog‘oz shaklida bo‘lgan. Qog‘oz shaklidagi sug‘urta polislari axborot tizimiga kiritilmagani uchun tushunmovchilik bo‘lmasin deb, yo‘l harakati qoidalariga ushbu band kiritilgan.

Masalan, qo‘limda ID-karta bor. Lekin sug‘urta polisi o‘tgan yili may oyida bir yilga berilib, tizimga kiritilmagan bo‘lsa, planshetda ko‘rinmaydi. Shuning uchun fuqarolar sarsongarchiligining oldini olish maqsadida qavs ichida ko‘rsatib ketildi. Sug‘urta polislari tizimga to‘liq kiritilgandan keyin bu kabi muammolar bo‘lmaydi. Agar qo‘lingizda qog‘oz sug‘urta polisi bo‘lsa, ‘prava’ni olib yurishingiz kerak. E-polis tizimiga sug‘urta polisingiz kiritilgan bo‘lsa, unda olib yurish shart bo‘lmaydi. Agar buni kiritmasak, tushunmovchiliklar yuzaga kelishi mumkin. Chunki men tizimda tekshirib ko‘raman, unda bo‘lmaydi, qo‘lidagini ko‘rsatsa, biz uni tan olmasligimiz mumkin. Shunday holatlarning oldini olish maqsadida band kiritib ketildi”, — dedi tashkilot rasmiysi.

Avvalroq yangi tartibdagi yo‘l harakati qoidalariga asosan haydovchilarga me’yoridan ortiq balandlikda musiqa tinglash va signal chalish taqiqlangani xabar qilingandi. Shuningdek, avtomobil old o‘rindig‘ida o‘tirib xavfsizlik kamarini taqmagan yo‘lovchi jarimaga tortilishi mumkinligi aytilgan.