Xitoy harbiylari AQSHning Tayvanga yuborayotgan “noto‘g‘ri signallari”ga javoban 15-aprel kuni Tayvan yaqinida mashg‘ulotlar o‘tkazadi, deb xabar berdi “Kommersant” Xitoy Mudofaa vazirligining bayonotiga tayanib. Bu signallardan biri sifatida AQSH kongressmenlarining orolga tashrifi ko‘rilayotgan bo‘lishi mumkin.
“Bu haqiqiy ikkiyuzlamachilik va ishonchni so‘ndirish. Xitoy bunga keskin qarshi va allaqachon AQSHga rasmiy bayonot yuborgan”, — deyiladi Mudofaa vazirligida. Vazirlik ma’lumotlariga ko‘ra, Qo‘shma Shtatlar Xitoyga orolni qo‘llab-quvvatlamaslikka va’da bergan bo‘lsa-da, “Tayvanlik ayirmachilarga jiddiy noto‘g‘ri signallar” yubormoqda.
Xitoyning harbiy mashg‘ulotlariga harbiy kemalar, bombardimonchi va qiruvchi samolyotlar, “ko‘p maqsadli jangovar patrullarni tashkil etish uchun” boshqa kuchlar jalb qilinadi hamda dengiz va havo hududida manyovrlar o‘tkaziladi.
14-aprel kuni olti nafar amerikalik kongressmenlar guruhi e’lon qilinmagan tashrif bilan Tayvanga kelgan, deb xabar bermoqda Reuters. Shu fonda Oq uy Tayvanning Xitoy bilan harbiy yo‘l orqali birlashishiga yo‘l qo‘ymasligini bildirgan.
Qo‘shma Shtatlar Tayvan (Xitoy Respublikasi) bilan rasmiy munosabatlarga ega emas, ammo orolni, jumladan, qurol-yarog‘ yetkazib berish orqali qo‘llab-quvvatlaydi. Xitoy nuqtai nazaridan, Tayvan XXRning xuddi shu nomdagi ma’muriy birligi tarkibiga kiradi. AQSH prezidenti Jo Baydenning Tayvanni qo‘llab-quvvatlashi AQSHning Xitoy bilan munosabatlarini keskinlashtirdi.
Mavzuga doir:
- “Tayvan Ukrainaning harakatlar taktikasini e’tiborga olishi lozim” — AQSH qo‘mondonlar shtabi qo‘mitasi rahbari
- Tayvan Mudofaa vazirligi Xitoy harbiy havo kuchlarining 13 ta samolyoti orolga yuborilganini xabar qildi
- Xitoy AQSHni Tayvan mustaqilligini rag‘batlantirish harbiy ziddiyatga olib kelishi haqida ogohlantirdi
Izoh (0)