AQSH Kongressining Respublikachilar partiyasidan saylangan ikki nafar a’zosi — Stiv Deyns va Viktoriya Sparts Kiyevga tashrif buyurib, unga qo‘shni Bucha shahri va Borodyanka qishlog‘ini ko‘zdan kechirdi, deb xabar beradi The New York Times.
Ma’lumotlarga ko‘ra, kongressmenlar Kiyevga G‘arbiy Ukraina hududidan poyezdda kelgan. Bir kun avval ular Ukraina rasmiylaridan taklif olishgan.
Gazetaning yozishicha, bu Rossiya tomonidan maxsus operatsiya boshlanganidan beri AQSH rasmiylarining Ukrainaga ilk bor tashrif buyurishi. Deys tashrif bilan Sharqiy Yevropa davlatlarida bo‘lgan, biroq safarini qoldirib, Kiyevga yo‘l olishga majbur bo‘lgan. O‘z navbatida Sparts Ukrainada tug‘ilgani sabab mamlakatga “norasmiy tashrifni rejalashtirgan”.
Tashrif davomida parlamentning ikkala a’zosi AQSH tomonidan Ukrainaga harbiy yordam ko‘rsatilishini qo‘llab-quvvatlagan.
Shu kunning o‘zida AQSH prezidenti Jo Bayden o‘z administratsiyasining yuqori martabali amaldorini muzokaralar uchun Kiyevga yuborayotganini ma’lum qilgan. Jurnalistning kim borishi to‘g‘risidagi aniqlashtiruvchi savoliga Bayden “Siz borishga tayyormisiz?”, deya javob bergan. Jurnalistning “O‘zingiz-chi?”, degan savoliga AQSH prezident “ha”, deya javob qaytargan.
Daily Mail’ning yozishicha, Bayden bu kabi tashrifni amalga oshirishga birinchi marta qiziqish bildirmayapti. Mart oyida Polshadagi amerikalik harbiylar bilan uchrashuv davomida Bayden Ukraina chegarasini kesib o‘tolmasligini, bunga yo‘l qo‘ymasliklarini aytgandi.
Oq uy administratsiyasining vaziyatdan xabardor vakilining so‘zlariga ko‘ra, prezident Bayden yoki vitse-prezident Xarrisning Ukrainaga tashrifi haqida gap ketmayapti, bu AQSH davlat kotibi Entoni Blinken yoki mudofaa vaziri Lloyd Ostin bo‘lishi mumkin.
Fevral oxiridan buyon Ukrainaga ayrim xorij siyosatchilari tashrif buyurdi, xususan, Yevroittifoqning tashqi ishlar masalalari bo‘yicha oliy vakili Jozep Borrel, Yevrokomissiya rahbari Ursula fon der Lyayyen. Ular Kiyevga 8-aprel kuni kelgandi. Shuningdek, Buyuk Britaniya bosh vaziri Boris Jonson, Avstriya kansleri Karl Nexammer ham Kiyevga tashrif buyurgan.
Izoh (0)