Yevropada xavfsizlik va hamkorlik tashkiloti (YXHT) ekspertlari Ukrainada 24-fevraldan 1-aprelgacha bo‘lgan voqealar bo‘yicha 108 sahifalik hisobotni e’lon qildi.
Mutaxassislar Mariupoldagi tug‘uruqxona va drama teatrining o‘qqa tutilishiga rossiyalik harbiylar javobgar degan xulosaga keldi. Har ikki holatda ham javobgar shaxslar harbiy jinoyat sodir etgan, deydi tashkilot vakillari. 300 ga yaqin odamning hayotiga zomin bo‘lgan teatrning o‘qqa tutilishi YXHT ekspertlari tomonidan xalqaro gumanitar huquqning “qo‘pol buzilishi” deb baholandi.
Hisobot mualliflarining fikricha, Rossiya vakillari tomonidan sodir etilgan “maqsadli qotillik” va “tinch aholini, shu jumladan. jurnalistlar va amaldorlarni zo‘rlik bilan yo‘q qilish yoki o‘g‘irlash” insoniyatga qarshi jinoyat sifatida baholanishi mumkin.
“Umuman olganda, hisobotda Rossiya qo‘shinlarining Ukrainadagi g‘ayriinsoniy harakatlari hujjatlashtirilgan. Bunga tinch aholiga hujumlar, shifoxonalarga hujumlar, zo‘rlash, qatl qilish, talon-toroj qilish va tinch aholini Rossiyaga majburan deportatsiya qilish holatlari kiradi”, — dedi AQSHning YXHTdagi elchisi Maykl Karpenter.
Hisobotda Bucha va Kiyev viloyatining boshqa shahar va qishloqlarida tinch aholining o‘ldirilishi haqida aprel oyi boshida ma’lum bo‘lgan ma’lumotlar kiritilmagan. Ukraina rasmiylari Buchada Rossiya ishg‘oli paytida 400 nafar tinch aholi halok bo‘lganini ma’lum qilgandi.
Mart oyi oxirida YXHT Ukrainadagi maxsus kuzatuv missiyasining mandatini Rossiyaning pozitsiyasi tufayli uzaytira olmadi. YXHT missiyasi 2014-yildan beri Donbassdagi mojaro zonasida ishlamoqda.
Izoh (0)