Европада хавфсизлик ва ҳамкорлик ташкилоти (ЕХҲТ) экспертлари Украинада 24 февралдан 1 апрелгача бўлган воқеалар бўйича 108 саҳифалик ҳисоботни эълон қилди.
Мутахассислар Мариуполдаги туғуруқхона ва драма театрининг ўққа тутилишига россиялик ҳарбийлар жавобгар деган хулосага келди. Ҳар икки ҳолатда ҳам жавобгар шахслар ҳарбий жиноят содир этган, дейди ташкилот вакиллари. 300 га яқин одамнинг ҳаётига зомин бўлган театрнинг ўққа тутилиши ЕХҲТ экспертлари томонидан халқаро гуманитар ҳуқуқнинг «қўпол бузилиши» деб баҳоланди.
Ҳисобот муаллифларининг фикрича, Россия вакиллари томонидан содир этилган «мақсадли қотиллик» ва «тинч аҳолини, шу жумладан. журналистлар ва амалдорларни зўрлик билан йўқ қилиш ёки ўғирлаш» инсониятга қарши жиноят сифатида баҳоланиши мумкин.
«Умуман олганда, ҳисоботда Россия қўшинларининг Украинадаги ғайриинсоний ҳаракатлари ҳужжатлаштирилган. Бунга тинч аҳолига ҳужумлар, шифохоналарга ҳужумлар, зўрлаш, қатл қилиш, талон-торож қилиш ва тинч аҳолини Россияга мажбуран депортация қилиш ҳолатлари киради», — деди АҚШнинг ЕХҲТдаги элчиси Майкл Карпентер.
Ҳисоботда Буча ва Киев вилоятининг бошқа шаҳар ва қишлоқларида тинч аҳолининг ўлдирилиши ҳақида апрель ойи бошида маълум бўлган маълумотлар киритилмаган. Украина расмийлари Бучада Россия ишғоли пайтида 400 нафар тинч аҳоли ҳалок бўлганини маълум қилганди.
Март ойи охирида ЕХҲТ Украинадаги махсус кузатув миссиясининг мандатини Россиянинг позицияси туфайли узайтира олмади. ЕХҲТ миссияси 2014 йилдан бери Донбассдаги можаро зонасида ишламоқда.
Изоҳ (0)