Rossiya qo‘shinlari Kiyev viloyatini tark etdi. Ular qoldirgan manzara — kuli ko‘kka sovurilgan shahar-qishloqlar va yo‘llarda sochilib yotgan o‘nlab tinch aholining jasadlarini butun dunyo ko‘rdi (jabrlanganlarning aniq soni hali noma’lum). Buchada ayrim jasadlar qo‘llari bog‘langan holda topilgan. Shahar meri Bucha “murdalar bilan qoplangan”ini aytdi. Uning so‘zlariga ko‘ra, odamlarga boshining orqa qismidan o‘q uzishgan. Motijin qishlog‘ida yetakchi Olga Suxenko va yaqinlarining jasadlari ommaviy qabrdan topildi. Kiyev viloyatidagi avtotrassalardan birining chetida fotomuxbirlar yalang‘och ayollar jasadini ko‘rdi; ularning yarim tanasi kuyib ketgandi. Urushning eng dahshatli manzaralarini aks ettiruvchi suratlar Ukraina rasmiylari, shuningdek, Reuters va AFP agentliklari tomonidan nashr etilgan.

Bucha

“Dunyo dahshatga tushishi kerak”

Ukraina prezident devoni rahbarining maslahatchisi Aleksey Arestovich o‘zining videomurojaatida Kiyev viloyatidagi shaharlar – Bucha, Irpen va Gostomelda sodir bo‘lgan voqealardan dunyo dahshatga tushishi kerakligini aytdi. U ushbu shaharlardagi manzaralarni qo‘rqinchli filmlardagi kadrlarga qiyosladi hamda Rossiya qo‘shinlarini urush jinoyatlarida, jumladan, talonchilik, zo‘rlash va tinch aholini o‘ldirishda aybladi.

Arestovichning so‘zlariga ko‘ra, aksariyat qurbonlarning qo‘llari bog‘langan, badanlarida qiynoq izlari bor, ko‘pchiligining boshiga orqadan o‘q uzilgan.

“Dunyo Bucha, Irpen va Gostomelda sodir bo‘lgan voqealardan dahshatga tushishi kerak. Afsuski, Ukrainaning boshqa shaharlarida ham ahvol bundan yaxshiroq emas. Ammo Ukraina Qurolli kuchlari, Ukrainaning boshqa mudofaa kuchlari va maxsus xizmatlari jinoyatchilarni topish va jazolash uchun hamma narsani qiladi”, — dedi Arestovich va “hech qanday jinoyat jazosiz qolmasligini” qo‘shimcha qildi.

“Qotillar, talonchilar, jallodlar”. Zelenskiy ijtimoiy tarmoqlardagi sahifalariga Buchadan olingan suratlarni joylashtirdi.

Ukraina prezidenti Vladimir Zelenskiy suratlar ostida quyidagi so‘zlarni qoldirgan: “Rossiyalik harbiylarning onalariga buni ko‘rishni maslahat beraman. Qanday haromilarni tarbiyalaganingizni ko‘ring. Qotillar, talonchilar, jallodlar”.

Ukraina bosh prokurori Irina Venediktovaning ma’lum qilishicha, Rossiya harbiylaridan ozod qilingan Kiyev viloyati hududlarida 410 nafar tinch aholining jasadlari yig‘ib olingan. Uning so‘zlariga ko‘ra, sud-tibbiyot ekspertlari hozirgacha 140 qurbonning jasadini ko‘zdan kechirdi.

Dmitrovka

Yasnogorodka

Motijin

Rossiya Kiyev viloyatidan olingan kadrlarni feyk deb atamoqda

Rossiya Mudofaa vazirligining rasmiy Telegram kanalida “Feykka qarshi urush” kanalidan repost paydo bo‘ldi, unda rus qo‘shinlari olib ketilganidan keyin Bucha shahridan o‘nlab jasadlar topilgani haqidagi xabarlar “rejalashtirilgan media kampaniyasi” deb atalmoqda.

“Bucha haqidagi xabarlar bir vaqtning o‘zida bir nechta xorijiy nashrlarda paydo bo‘ldi — bu rejalashtirilgan media kampaniyasiga o‘xshaydi. 30-mart kuni qo‘shinlar shaharni tark etganini hisobga olsak, bu kadrlar 4 kun davomida qayerda edi? Ularning bo‘lmagani faqat soxtalikni tasdiqlaydi”, — deyiladi xabarda.

“Feykka qarshi urush” mualliflari ham Buchadan olingan video va fotosuratlarni sahnalashtirilgan deb hisoblamoqda.

Bundan tashqari, Telegram kanali ommaviy qabrni Ukraina Qurolli kuchlari yasagan deb da’vo qilmoqda. Qaysi qabr haqida gap ketayotgani aniq aytilmagan. Avvalroq Bucha meri Anatoliy Fedoruk qurbonlar haqidagi xabarlarga izoh berar ekan, Ukraina armiyasi shahar ustidan nazoratni qayta tiklaganidan so‘ng, rus qo‘shinlari qoldirgan “280 kishining jasadi ommaviy qabrlarga dafn etilgani”ni aytgandi.

Irpen

Keyinroq “Zvezda” telekanali Rossiya Mudofaa vazirligining bayonotini e’lon qildi. Vazirlik Bucha shahrida tinch aholi vakillarining jasadlari aks etgan fotosuratlar va videolarni “navbatdagi provokatsiya” va “G‘arb ommaviy axborot vositalari uchun Kiyev rejimining navbatdagi sahnasi” deb atagan.

“Bucha posyolkasi Rossiya Federatsiyasi Qurolli Kuchlari nazorati ostida bo‘lgan davrda birorta ham mahalliy aholi zo‘ravonlik harakatlaridan jabr ko‘rmagan”, — deyiladi bayonotda.

Ilgari Mariupolda bolalar shifoxonasi va tinch aholi yashiringan drama teatri Rossiya kuchlari tomonidan bombardimon qilingani haqidagi xabarlarga ham Rossiya rasmiylari shunday munosabat bildirgandi.