Janubiy Afrika Respublikasi sharqida joylashgan Durban shahrida kuzatilgan suv toshqinlari oqibatida 306 nafar odam halok bo‘ldi. Bu haqda mamlakat hukumati axborotiga tayanib, The Guardian xabar bergan.
Qayd etilishicha, 60 yil ichida kuzatilgan eng katta suv toshqinlari tufayli Durbanda va shahar atrofidagi hududlarda ko‘priklar hamda yo‘llarga jiddiy talafot yetgan. Poyezdlar qatnovida muammolar kuzatilgan. 6000 dan ziyod xonadon ziyon ko‘rgan. Kuchli shamol Afrikadagi eng muhim yuk konteynerlarini Durban porti bo‘ylab sochib tashlagan, sohildagi faoliyat to‘xtab qolgan.
The Guardian nashrining yozishicha, bir qator hududlarda shosse suv bilan qoplanishi oqibatida svetoforlarning ham faqat yuqori qismi ko‘rinmoqda.
Sinoptik Dipuo Tavanning so‘zlariga ko‘ra, Janubiy Afrikaning Kvazulu-Natal provinsiyasida oxirgi 48 soat davomida 450 millimetr miqdorida yog‘ingarchilik kuzatilgan va bu Durbandagi 1009 millimetrli yillik me’yoriy ko‘rsatkichning qariyb yarmi.
JAR prezidenti Durban va uning atrofidagi suv toshqinlaridan talafot ko‘rgan hududlarda borib, u yerdagi aholiga hamdardlik bildirgan.
Avval Braziliyada yuz bergan suv toshqinlari va ko‘chki oqibatida 150 dan ziyod odamning halok bo‘lgani, Madagaskarga yopirilgan bo‘ron qurbonlarining soni 100 dan oshgani, Ekvador poytaxtidagi suv toshqini oqibatida 11 kishi halok bo‘lgani haqida xabarlar berilgan.
Izoh (0)