Украинадан Руминияга ўтган икки нафар Ўзбекистон фуқароси ватанга қайтарилди, деб хабар беради «Дунё» агентлиги.
Ўзбекистоннинг Истанбулдаги Бош консулхонаси маълумотига кўра, 1 апрель куни ваколатхонага Ўзбекистон фуқаролари опа-сингил Алина Исмагилова (1992 йилда туғилган) ва Елвина Исмагилованинг (1994 йилда туғилган) мурожаати келиб тушган. Унда ушбу икки фуқарони Руминиядан Ўзбекистонга қайтариш юзасидан амалий ёрдам сўралган.
Мурожаатчиларнинг сўзларига кўра, улар март ойида Украинанинг Одесса шаҳридан Руминиянинг Бухарест шаҳрига гуманитар йўлак орқали қочиб ўтган.
Бош консулхонанинг саъй-ҳаракатлари билан ушбу фуқаролар 2 апрель куни Туркиянинг Истанбул шаҳрига беталафот етиб келган. 2—5 апрель кунлари улар Истанбулдаги меҳмонхоналардан бирига жойлаштирилиб, зарур озиқ-овқат билан таъминланган.
Туркиядаги ҳомийлар маблағлари ҳисобидан иккита авиачипта харид қилиниб, опа-сингил Исмагиловалар 5 апрель куни Ўзбекистонга қайтарилган.
Эслатиб ўтамиз, 19 март куни Ўзбекистон фуқароларини Украинадан эвакуация қилиш жараёнлари якунлангани тўғрисида хабар берилганди. Кейинроқ Ўзбекистон Ташқи ишлар вазирлиги фуқароларни Украинадан эвакуация қилиш ҳали якунланмаганини, 23 март куни 146 нафар ўзбекистонлик ватанга қайтарилганини маълум қилди.
Изоҳ (0)