“Yuventus” va “Napoli” prezidentlari futbolga oid faoliyatdan chetlashtirilishi mumkin. Italiya futbol federatsiyasi prokurori funksionerlarga nisbatan shunday jazo so‘ragan, deya xabar beradi Football Italia.
Har ikkala klub futbolchilarning transfer narxlarini oshirib ko‘rsatib, yolg‘on ma’lumot berib kelgan.
Prokuratura “Yuventus” prezidenti Andrea Anyellini 1 yilga, turinliklar sport direktori Federiko Kerubinini 6 oyga, klub vitse-prezidenti Pavel Nedved va bosh direktor Maurisio Arrivabeneni 8 oyga, hozirda “Tottenhem”da faoliyat olib borayotgan sobiq direktor Fabio Paratichini 16 oyga diskvalifikatsiya qilishni so‘ramoqda. Undan tashqari ayblovchilar “Yuventus”ni 800 ming yevro jarimaga tortishni talab qilmoqda.
“Napoli” prezidenti Aurelio de Laurentis 11 oy, uning rafiqasi, o‘g‘li va qizi 6 oyga, neapolliklar bosh direktori Andrea Kiavelli 9 oy muddatga futbol faoliyatidan chetlatilishi mumkin. Klub esa 329 ming yevro miqdorida jarimaga tortilishi kutilmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)