Tracker’dan Porsche Taycan’gacha: yaqinlariga mashina sovg‘a qilgan o‘zbek shou-biznesi vakillari (video)

O‘zbek shou-biznesi vakillari orasida oila a’zolari hamda yaqin do‘stlariga qimmatbaho sovg‘a — avtomobil sovg‘a qilganlari bisyor. Quyida ana shunday saxiy mashhurlar haqida so‘z boradi.

Rashid Xoliqov

O‘zbekistonda xizmat ko‘rsatgan artist Rashid Xoliqov 2020-yili nabirasi Emin dunyoga kelishi munosabati bilan kelini Fayruzaga Malibu Turbo, rafiqasiga esa BMW X7 rusumli qimmatbaho avtomobillarni sovg‘a qilgan. Xonandaning rafiqasi va keliniga qilgan ushbu qimmatbaho sovg‘alari ijtimoiy tarmoqlarda muhokamalarga sabab bo‘lgan edi.

Mansur Agaliyev

O‘zbekiston va Qoraqalpog‘iston xalq artisti Yulduz Usmonovaning 56 yoshga to‘lishi munosabati bilan turmush o‘rtog‘i Mansur Agaliyev BMW X7 qimmatbaho avtomobilini sovg‘a qilgan.

Sevara Soliyeva

Sevara Soliyeva “Shok.uz” YouTube-kanaliga bergan intervyusida turmush o‘rtog‘i sovg‘a qilgan avtomobilni qaynotasiga bergani haqida so‘zladi.

— Turmush o‘rtog‘im Nexia-3 avtomobilini sovg‘a qilgandi. Ammo uni o‘z ixtiyorim bilan qaynotamga sovg‘a qildim. Men-ku hali yoshman, piyoda yurish menga qiyinchilik tug‘dirmaydi. Qaynotam esa keksayib qolgan. Mendan ko‘ra ularga mashina ko‘proq kerak, — deydi Sevara Soliyeva.

Alisher Botirov

“Million” jamoasi a’zosi Alisher Botirov 2021-yili otasining tavallud kuni munosabati bilan unga Tracker avtomobilini sovg‘a qilgan.

Sharof Muqimov

2021-yilning 19-dekabr kuni o‘g‘il farzandli bo‘lgan Sharof Muqimov ayoliga minnatdorlik bildirish maqsadida unga qimmatbaho avtomobil sovg‘a qilgan.

— Ayolim o‘g‘limni dunyoga keltirganida unga syurpriz qilib Tracker avtomobilini sovg‘a qildim. Undan avval Spark sovg‘a qilgandim. Ayolga qancha ko‘p e’tibor berilsa, oila yanada mustahkamlanadi, — deydi xonanda Sharof Muqimov.

Mitti vine — Farhod Mannopov

Instagram foydalanuvchilariga qiziqarli vaynlari bilan yaxshi tanish bo‘lgan Farhod Mannopov onasining tavallud kuniga kutilmagan sovg‘a taqdim etgan.

— Onajonimning tug‘ilgan kuniga mashina sovg‘a qilishni niyat qilgandim. Avvalo, shu kunga yetkazganiga shukr. Onajonimga Tracker avtomobilini sovg‘a qildim. Bundan juda quvondilar, — deydi vayner.

Jahongir Xo‘jayev

2022-yilning 10-mart kuni poytaxtdagi “Yakkasaroy” to‘yxonasida Sariq bola taxallusi bilan tanilgan aktyor Jahongir Xo‘jayev hamda aktrisa Asal Abdullayevaning nikoh oqshomi bo‘lib o‘tdi. Jahongir Xo‘jayev to‘yi kuni otasiga qimmatbaho avtomobilni hadya qilgan.

— Boshlovchilik qilgan to‘ylarimning birida kuyov otasiga mashina sovg‘a qilgandi. O‘shanda to‘yim kuni men ham dadamga shunday syurpriz qilaman, deb niyat qilgandim. To‘yim kuni ana shu niyatim amalga oshdi, — deydi Jahongir Xo‘jayev.

Yigitali Mamajonov

2022-yilda aktyor Yigitali Mamajonov rafiqasi Muqaddas Sa’dullayevaning bir necha yillik orzusini amalga oshirib, unga avtomobil sovg‘a qildi.

Muqaddas Sa’dullayeva Instagram kuzatuvchilari bilan xursandchiligini bo‘lishar ekan, anchadan buyon Hyundai Elantra avtomobiliga havas qilib yurganini aytib o‘tdi. “Endi uch bola bilan ko‘chaga chiqishga qiynalmayman”, — deydi aktrisa.

Dilfuza Ismoilova

“Toshkentning sho‘x qizi” deya e’tirof etiluvchi Dilfuza Ismoilova “Al media” YouTube-kanaliga bergan intervyusida shu kungacha 22 ta mashinani hadya qilib yuborganini aytib o‘tgandi. Intervyudan so‘ng kenja qudasining tavallud kuniga ham Spark avtomobilini sovg‘a qildi.

— Ba’zi boylar begonalar tugul yaqinlariga ham yordam bermaydi. Mashina sovg‘a qilganimni maqtanish uchun aytmayman. Shunchaki, puli bor odamlarda boshqa insonlarning haqqi borligini bilishlarini xohlayman, — deydi xonanda Dilfuza Ismoilova.

Dilso‘z

Oilada yolg‘iz farzand bo‘lgan xonanda Dilso‘z ham onasining tavallud kuniga kutilmagan sovg‘a tayyorlagan.

Xonanda Dilso‘z onasining 56 yoshga to‘lishi munosabati bilan  “Navro‘z” bog‘ida kichik marosim o‘tkazgan. Onasiga qora rangdagi  Spark avtomobilini sovg‘a qilib, “Ona, sizni yaxshi ko‘raman” qo‘shig‘ini kuylagandi.

Kaniza

Hamisha muhokamalar markazida bo‘ladigan xonanda Kaniza bir necha yildan buyon uning jamoasida faoliyat yuritayotgan Sevara ismli ma’muriga kutilmagan hadya berdi. Ammo ba’zi Instagram kuzatuvchilari uni navbatdagi piar deb hisoblashdi.

Xonanda Kaniza ma’muri Sevaraga Ramazon oyi munosabati bilan Gentra avtomobilini hadya qildi.

Nodir Zoitov

Sozanda va xonanda Nodir Zoitov otasini avtosalonga olib borib, unga kutilmagan tuhfani taqdim etgan.

O‘sha kuni Nodir Zoitovning otasi tug‘ilgan kunini nishonlayotgan edi. Xonanda shu kunning o‘zidayoq otasiga atalgan yangi qo‘shig‘ini ham premyera qilgan.

Azamat Ahrorov

Azamat Ahrorov esa Tashkent City’da otasiga yangi mashina kalitini topshirgan.

Aktyor va rejissor Azamat Ahrorov otasining 65 yoshni qarshilashi munosabati bilan unga Gentra avtomobilini sovg‘a qildi.— Bu kunni uzoq kutganman. Har bir erkakka otasiga mashina sovg‘a qilish nasib etsin. Bu otamga kichik o‘g‘lidan, kichik tuhfa bo‘ldi, — deydi Azamat Ahrorov.

Munisa Rizayeva

Xonanda Munisa Rizayeva esa singlisining tug‘ilgan kuniga qimmatbaho oq “toychoq” taqdim etgan.

U dadasi bilan birga singlisi Karima Rizayevaning tug‘ilgan kuniga Porsche Taycan avtomobilini sovg‘a qilgan. Bu qimmatbaho avtomobilning narxi 80 000 ming dollardan boshlanadi.