Tracker’дан Porsche Taycan’гача: яқинларига машина совға қилган ўзбек шоу-бизнеси вакиллари (видео)

Ўзбек шоу-бизнеси вакиллари орасида оила аъзолари ҳамда яқин дўстларига қимматбаҳо совға — автомобиль совға қилганлари бисёр. Қуйида ана шундай сахий машҳурлар ҳақида сўз боради.

Рашид Холиқов

Ўзбекистонда хизмат кўрсатган артист Рашид Холиқов 2020 йили набираси Эмин дунёга келиши муносабати билан келини Файрузага Malibu Turbo, рафиқасига эса BMW Х7 русумли қимматбаҳо автомобилларни совға қилган. Хонанданинг рафиқаси ва келинига қилган ушбу қимматбаҳо совғалари ижтимоий тармоқларда муҳокамаларга сабаб бўлган эди.

Мансур Агалиев

Ўзбекистон ва Қорақалпоғистон халқ артисти Юлдуз Усмонованинг 56 ёшга тўлиши муносабати билан турмуш ўртоғи Мансур Агалиев BMW Х7 қимматбаҳо автомобилини совға қилган.

Севара Солиева

Севара Солиева «Shok.uz» YouTube-каналига берган интервьюсида турмуш ўртоғи совға қилган автомобилни қайнотасига бергани ҳақида сўзлади.

— Турмуш ўртоғим Nexia-3 автомобилини совға қилганди. Аммо уни ўз ихтиёрим билан қайнотамга совға қилдим. Мен-ку ҳали ёшман, пиёда юриш менга қийинчилик туғдирмайди. Қайнотам эса кексайиб қолган. Мендан кўра уларга машина кўпроқ керак, — дейди Севара Солиева.

Алишер Ботиров

«Миллион» жамоаси аъзоси Алишер Ботиров 2021 йили отасининг таваллуд куни муносабати билан унга Tracker автомобилини совға қилган.

Шароф Муқимов

2021 йилнинг 19 декабрь куни ўғил фарзандли бўлган Шароф Муқимов аёлига миннатдорлик билдириш мақсадида унга қимматбаҳо автомобиль совға қилган.

— Аёлим ўғлимни дунёга келтирганида унга сюрприз қилиб Tracker автомобилини совға қилдим. Ундан аввал Spark совға қилгандим. Аёлга қанча кўп эътибор берилса, оила янада мустаҳкамланади, — дейди хонанда Шароф Муқимов.

Митти вине — Фарҳод Маннопов

Instagram фойдаланувчиларига қизиқарли вайнлари билан яхши таниш бўлган Фарҳод Маннопов онасининг таваллуд кунига кутилмаган совға тақдим этган.

— Онажонимнинг туғилган кунига машина совға қилишни ният қилгандим. Аввало, шу кунга етказганига шукр. Онажонимга Tracker автомобилини совға қилдим. Бундан жуда қувондилар, — дейди вайнер.

Жаҳонгир Хўжаев

2022 йилнинг 10 март куни пойтахтдаги «Яккасарой» тўйхонасида Сариқ бола тахаллуси билан танилган актёр Жаҳонгир Хўжаев ҳамда актриса Асал Абдуллаеванинг никоҳ оқшоми бўлиб ўтди. Жаҳонгир Хўжаев тўйи куни отасига қимматбаҳо автомобилни ҳадя қилган.

— Бошловчилик қилган тўйларимнинг бирида куёв отасига машина совға қилганди. Ўшанда тўйим куни мен ҳам дадамга шундай сюрприз қиламан, деб ният қилгандим. Тўйим куни ана шу ниятим амалга ошди, — дейди Жаҳонгир Хўжаев.

Йигитали Мамажонов

2022 йилда актёр Йигитали Мамажонов рафиқаси Муқаддас Саъдуллаеванинг бир неча йиллик орзусини амалга ошириб, унга автомобиль совға қилди.

Муқаддас Саъдуллаева Instagram кузатувчилари билан хурсандчилигини бўлишар экан, анчадан буён Hyundai Elantra автомобилига ҳавас қилиб юрганини айтиб ўтди. «Энди уч бола билан кўчага чиқишга қийналмайман», — дейди актриса.

Дилфуза Исмоилова

«Тошкентнинг шўх қизи» дея эътироф этилувчи Дилфуза Исмоилова «Аl media» YouTube-каналига берган интервьюсида шу кунгача 22 та машинани ҳадя қилиб юборганини айтиб ўтганди. Интервьюдан сўнг кенжа қудасининг таваллуд кунига ҳам Spark автомобилини совға қилди.

— Баъзи бойлар бегоналар тугул яқинларига ҳам ёрдам бермайди. Машина совға қилганимни мақтаниш учун айтмайман. Шунчаки, пули бор одамларда бошқа инсонларнинг ҳаққи борлигини билишларини хоҳлайман, — дейди хонанда Дилфуза Исмоилова.

Дилсўз

Оилада ёлғиз фарзанд бўлган хонанда Дилсўз ҳам онасининг таваллуд кунига кутилмаган совға тайёрлаган.

Хонанда Дилсўз онасининг 56 ёшга тўлиши муносабати билан  «Наврўз» боғида кичик маросим ўтказган. Онасига қора рангдаги  Spark автомобилини совға қилиб, «Она, сизни яхши кўраман» қўшиғини куйлаганди.

Каниза

Ҳамиша муҳокамалар марказида бўладиган хонанда Каниза бир неча йилдан буён унинг жамоасида фаолият юритаётган Севара исмли маъмурига кутилмаган ҳадя берди. Аммо баъзи Instagram кузатувчилари уни навбатдаги пиар деб ҳисоблашди.

Хонанда Каниза маъмури Севарага Рамазон ойи муносабати билан Gentra автомобилини ҳадя қилди.

Нодир Зоитов

Созанда ва хонанда Нодир Зоитов отасини автосалонга олиб бориб, унга кутилмаган туҳфани тақдим этган.

Ўша куни Нодир Зоитовнинг отаси туғилган кунини нишонлаётган эди. Хонанда шу куннинг ўзидаёқ отасига аталган янги қўшиғини ҳам премьера қилган.

Азамат Аҳроров

Азамат Аҳроров эса Tashkent City’да отасига янги машина калитини топширган.

Актёр ва режиссёр Азамат Аҳроров отасининг 65 ёшни қаршилаши муносабати билан унга Gentra автомобилини совға қилди.— Бу кунни узоқ кутганман. Ҳар бир эркакка отасига машина совға қилиш насиб этсин. Бу отамга кичик ўғлидан, кичик туҳфа бўлди, — дейди Азамат Аҳроров.

Муниса Ризаева

Хонанда Муниса Ризаева эса синглисининг туғилган кунига қимматбаҳо оқ «тойчоқ» тақдим этган.

У дадаси билан бирга синглиси Карима Ризаеванинг туғилган кунига Porsche Taycan автомобилини совға қилган. Бу қимматбаҳо автомобилнинг нархи 80 000 минг доллардан бошланади.