Italiya sanksiyaga uchragan Alisher Usmonovga tegishli 670 ming dollarlik hashamatli o‘q o‘tkazmaydigan limuzinini musodara qildi. Bu haqda Italiyaning Corriere della Sera gazetasi xabar bermoqda.
Corriere della Sera xabariga ko‘ra, hukumat so‘nggi bir necha kun ichida tog‘-kon va telekommunikatsiya magnati Alisher Usmonovga tegishli qora rangdagi Mercedes-Maybach S650 Guard VR10 rusumli avtomashinasini O‘rta Yer dengizidagi Sardiniya orolida hibsga oldi. Bu ma’lumotni boshqa nashrlar ham tasdiqlamoqda.
Italiya soliq politsiyasi 29-mart, seshanba kuni The Times nashriga avtomobil Usmonovning oroldagi hibsga olingan mulklari orasida ekanini tasdiqladi.
Italiyaning mahalliy gazetasi L’Unione Sarda ham rasmiylar uning Pevero ko‘rfazidagi 17 mln yevro yoki taxminan 19 mln dollarlik ko‘chmas mulk majmuasini va oltita korporativ avtomobilini musodara qilgani haqida xabar berdi. L’Unione Sarda ma’lumotlariga ko‘ra, uning Sardiniyadagi musodara qilingan aktivlari jami 66 mln yevro yoki taxminan 73 mln dollarni tashkil etadi.
Besh tonnalik Maybach taxminan 600 ming yevro yoki taxminan 670 ming dollar turadi. Zirhli qoplama va 10 santimetr qalinlikdagi derazalar portlash va pulemyot hujumlariga bardosh berishga mo‘ljallangan. Mercedes bir vaqtning o‘zida ikkita granataning portlashiga bardosh bera olishi aytilmoqda.
Usmonovga 28-fevral kuni Yevropa Ittifoqi tomonidan sanksiya qo‘llanilgan edi.
Buyuk Britaniya va AQSH sanksiyalari nishoniga aylangan milliarderning matbuot kotibi o‘tgan hafta The Guardian nashriga u o‘zining ba’zi aktivlarini, jumladan, Buyuk Britaniyadagi ikkita uyini ishonchli odamlar nomiga o‘tkazganini va endi ularga egalik qilmasligini aytdi.
Usmonov Bloomberg’ning Milliarderlar indeksiga ko‘ra, 18,7 mlrd dollarlik boylik bilan Rossiyaning beshinchi eng boy odami hisoblanadi.
Avvalroq Reuters sanksiyalarga uchragan Alisher Usmonovning mulklari haqida ma’lum qilgan edi.
Izoh (0)