“Manchester Yunayted” hujumchisi Krishtianu Ronalduning avtomobillarga bo‘lgan ishtiyoqi qanchalik darajada yuqori ekanligi barcha ma’lum. Fevral oyida futbolchining qaylig‘i Jorjina Rodriges haqidagi realiti-shouda Ronalduning garajiga ham sayohat qilindi.
Zamonaviy superkarlar joylashgan avtopark istalgan “temir arava”lar shaydosini o‘ziga rom etishi aniq. U yerda umumiy qiymati 20 million yevrodan ko‘proq bo‘lgan 18 ta mashinadan iborat kolleksiyani ko‘rish mumkin.
Ronalduning eng qimmat superkari qiymati 10,1 million yevro bo‘lgan Bugatti Centodieci hisoblanadi. Krishtianu uni 2020-yilning yozida “Yuventus”ning A Seriyadagi g‘alabasi sharafiga xarid qilgan.
Bugatti Centodieci — cheklangan miqdorda ishlab chiqarilgan rusumdir. Fransiya kompaniyasi brendning 110-yilligi munosabati bilan ushbu mashinalardan atigi 10 dona ishlab chiqargan. Avtomobilning maksimal tezligi soatiga 380 kilometrni tashkil qiladi. U 2,4 soniya ichida 100 km/soat tezlikka chiqa oladi.
CR7 ning eng arzon aravasi esa atigi 40 ming yevro turadi. Krishtianu Chevrolet Camaro’da asosan onasi bilan sayr qilishni ma’qul ko‘radi.
Uning sevimli avtomobili Rolls-Royce Cullinan. U bu haqida 2019-yilda bergan intervyusida aytib o‘tgan: “Bu mashinada qancha yursangiz ham belingiz og‘rib qolmaydi. Aksincha, bunday mashinada undan qutulasiz. Shunchaki ideal”.
To‘plamdagi barcha mashinalar ham Krishtianuning shaxsiy xaridlari emas. Ular orasida sovg‘alar ham topiladi — masalan, Mercedes G-Wagon Brabus. Bu “toychoq”ni unga qaylig‘i Jorjina 2020-yilda suyuklisining 35 yoshga to‘lgani munosabati bilan sovg‘a qilgan. Ronaldu mashinalar borasida kamtarlik qilib o‘tirmaydi. O‘shanda u quvonchini Instagram’da baham ko‘rgandi: “Sevgilim, ajoyib syurpriz uchun rahmat”.
Jorjina 2022-yilda ham qaylig‘ini e’tiborsiz qoldirmadi. U Krishning 37 yoshga to‘lishiga atab, Cadillac Escalade (150 ming funt) hadya qildi.
Ronining parkidan uchta Ferrari o‘rin olgan, ulardan birini u 2021-yilning may oyida xarid qilgan va bu o‘ziga xos shov-shuvlarga ham sabab bo‘lgandi. Ronaldu “Yuventus”ning “Milan”dan uchralgan mag‘lubiyatdan so‘ng (0:3) darhol mashinani olib kelishga ketib qoladi. Krishning mashg‘ulotlarni o‘tkazib yuborishi esa jamoadoshlarini g‘azablantiradi. Qizig‘i, Ferrari bazasiga parvozda unga “Yuve” prezidenti Andrea Anyelli hamrohlik qiladi.
Ronaldu u yerda Formula-1 jamoasi rahbari va poygachilar bilan uchrashib, ularga o‘z nomi yozilgan futbolkalarni topshiradi. Shuningdek, futbolchi zavodga ham tashrif buyurib, Ferrari Monza SP1’ni qabul qilib oladi.
Ushbu modelning seriyali ishlab chiqarilishi 500 nusxa bilan cheklangan. Aynan ushbu rusum Zlatan Ibrahimovichda ham mavjud.
Ushbu Ferrari o‘tgan asrning 50-yillardagi 750 Monza va 860 Monza formulali avtomobillaridan ilhomlanib ishlab chiqarilgan. To‘plam odatda maxsus kiyimlar to‘plami bilan jihozlanadi: poyga kombinezoni, dubulg‘a, qo‘lqoplar, sharf va poyabzal. Barchasi — o‘sha davr poygachisi qiyofasini qayta tiklash uchun. Superkar 810 ot kuchi va kuchli V12 dvigateliga ega, biroq uning asosiy xususiyati — old oynasining (“lobovoy”) yo‘qligida.
Ronaldu faoliyatining boshida mashinalar ishqibozi bo‘lmagan
Ronalduning hayotidagi birinchi mashina, albatta, o‘yinchoq bo‘lgan, biroq portugaliyalikni bunday narsalar bilan aldash mushkul edi. Futbolchining yaqinlari shunday eslaydi: “Bayramlarning birida unga pult bilan boshqariladigan mashina sovg‘a qildik, ammo bu uni xursand qilish uchun yetarli bo‘lmadi. U hech qanday munosabat bildirmadi, butun vujudi futbol bilan to‘la edi”.2017-yilda ispan ommaviy axborot vositalari Krishtianuning Portugaliya televideniyesiga bergan birinchi intervyusini topishning uddasidan chiqadi. O‘shanda uning qo‘lida “Oltin to‘p” o‘rniga ko‘p martalik metro chiptasi bor edi, xolos, boisi bor pulini onasiga jo‘natardi. Mashinalardagi uni qiziqtiradigan yagona jihat, qizil chiroqdan qo‘zg‘algan vaqtda ular bilan tezlik borasida raqobatlashish edi. Shuning uchun 2008-yilda, reklama roligi uchun Ronaldu Bugatti bilan musobaqalashganida, futbolchi uchun ssenariyni oldindan o‘qish shart emasdi.
Biroq Ronaldu 2003-yilda “Manchester Yunayted”ga ko‘chib o‘tishi bilan hammasi o‘zgarib ketdi. Krishtianu faoliyatini minilgan Audi A3 mashinasidan boshlagan, keyinroq paparatssilar uni shahar bo‘ylab Porsche Cayenne va BMW M6’da (o‘shanda 86 ming funt sterlingga baholangan) yurganini payqab qoladi. U vaqtlar Ronaldu endigina garajini to‘ldirishni boshlagandi. Ko‘p o‘tmay “Yunayted” bazasidagi avtoturargohda Roniga tegishli 140 ming funtlik yangi Bentley GT Speed paydo bo‘ladi.
Shundan keyin esa Krish mashinalarga tamomila mukkasidan ketdi: yangidan yangi nusxalar deyarli har yili, ba’zida esa bundan ham tez muddatda qo‘shilishda davom etmoqda.
Izoh (0)