O‘zbekistonda ayrim banklar elektromobillar uchun ekokredit taklif qila boshlashdi. Kredit muddati 48 oy, foiz stavkasi esa 23 foiz etib belgilangan.
Boshlang‘ich badal miqdori esa eng kamida 35 foiz bo‘lishi kerak. Bundan tashqari, 6 oylik imtiyozli muddat ham mavjud.
So‘nggi vaqtlarda O‘zbekistonda elektromobillar ommalashmoqda. Aprel oyi holatiga ko‘ra, elektromobillarni quvvatlantirish shoxobchalari O‘zbekistonning yetti viloyatida mavjud.
Zaryadlash stansiyalari umumiy soni 50 ga yaqinlashib qoldi, ularning asosiy qismi Toshkent va Farg‘ona vodiysida joylashgan. Yana bir nechta stansiyalar Samarqand, Qashqadaryo va Navoiy viloyatlarida bor.
Bundan tashqari, 2022-yilning yanvar—fevral oylarida O‘zbekiston 228 ta elektromobil import qilgan. Bu o‘tgan yilning mos davriga nisbatan 150 taga ortiq.
Hukumatning muhokamaga qo‘yilgan qaroriga ko‘ra, tashkilotlar tomonidan 2022-yildan boshlab xarid qilinadigan transport vositalarining kamida 20 foizi elektromobillar bo‘lishi talab etiladi.
Shu sababdan O‘zbekiston Ekologiya va atrof-muhitni muhofaza qilish davlat qo‘mitasi birinchilardan bo‘lib xizmat mashina parkiga 10 dona elektromobil xarid qilgan edi.
Izoh (0)