AQSHning O‘zbekistondagi elchisi Deniel Rozenblyum “Amerika ovozi” radiosiga bergan intervyusida rasmiy Toshkent Ukrainadagi urush bo‘yicha betaraf pozitsiya egallaganiga munosabat bildirdi.
Tushunaman va uni hurmat qilaman. Chunki O‘zbekiston naqadar murakkab vaziyatda ekanini anglaymiz. Yuqorida qayd etilgan tashriflar (Abdulaziz Komilov va Sardor Umurzoqovning 2022-yil mart oyida Vashingtonga tashrifi nazarda tutilmoqda – tahr.) paytida ham buni muhokama qildik. Maqsadlardan biri ham shu edi, o‘zi. Geografik va tarixiy omillar bor. Manfaatlar bois O‘zbekiston muvozanatli yo‘l tutishga majbur. Savdo aloqalari va sarmoya, Rossiyada, shuningdek, mehnat migrantlari ham bor. Ular yuboradigan mablag‘ mamlakat iqtisodi uchun salmoqli sarmoya. O‘zbekiston uchun hayot-mamot masalalari bu. Biz buni tushunamiz.Ukrainadagi murakkab ahvol haqida ko‘p to‘xtalmoqchi emasman, chunki odamlar biladi. Ammo ayrim jihatlar va ular bilan bog‘liq fundamental prinsiplarni tilga olmoqchiman. Chunki ularni O‘zbekiston bilan aloqalarda hamisha yodda tutamiz. Suverenitet va mustaqillik. Biz hamisha suverenitet, mustaqillik va hududiy yaxlitlikni e’zozlaymiz va ularni himoya qilamiz. Bular dunyo barqarorligi uchun o‘ta muhim xalqaro prinsiplar. Ular chetga uloqtirilsa, buzilsa, qudratliman degan davlat boshqasini vayron qiladi. Rossiyaning Ukrainaga bostirib kirishida shuni ko‘ryapmiz. Fikrimcha, bu prinsiplar O‘zbekiston uchun ham chuqur ahamiyat kasb etadi. Bunga uning 30 yilda bosib o‘tgan mustaqillik yo‘lidan ham guvohmiz.
Bir-birimizning pozitsiyalarimizni tushunish uchun ochiq gaplashib turish kerak. Tashqi ishlar vaziri Komilovning yaqinda qilgan bayonotlarini tingladik va nazarimda u tushuntirgan siyosat asosli, mantiqli va aniq. Shunday ekan, savolingizga javobim, albatta, bu siyosatni tushunamiz. O‘zbekiston bilan dunyodagi, jumladan, mintaqadagi hozirgi muammolarga qarshi birgalikda kurashishga bel bog‘laganmiz.
Deniel Rozenblyum, AQSHning O‘zbekistondagi elchisi
Eslatib o‘tamiz, 17-mart kuni O‘zbekiston tashqi ishlar vaziri Abdulaziz Komilov Ukraina atrofida bo‘layotgan mojaro yuzasidan O‘zbekistonning pozitsiyasini aytgandi. “O‘zbekiston Ukraina mustaqilligi, suvereniteti va hududiy yaxlitligini tan oladi. Biz Lugansk va Donetsk mustaqilligini tan olmaymiz”, — deya ta’kidlagan TIV rahbari.
Izoh (0)