O‘zbekistonda 86 ta alohida ta’limga ehtiyoji bo‘lgan bolalarga ta’lim berish muassasalari faoliyat yuritib, ularda 28 ming 159 nafar o‘quvchi ta’lim va tarbiya oladi. Bu haqda 13-aprel kuni AOKAda o‘tkazilgan brifingda Xalq ta’lim vazirligi axborot xizmati rahbari Laylo Rustamova ma’lum qildi.
Qayd etilishicha, mamlakatda 4 ta tayanch harakati shikastlangan va nutqida nuqsoni bor, 14 ta ko‘zi ojiz va zaif ko‘ruvchi, 18 ta kar va zaif eshituvchi va 50 ta aqli zaif bolalar uchun ixtisoslashtirilgan hamda 22 ta sanatoriy shaklidagi ta’lim muassasalari faoliyat yuritib kelmoqda. Ushbu muassasalar tomonidan 8668 nafar nogiron bolalarga uyda yakka tartibda ta’lim beriladi.
Qayd etilishcha, 2021-yilda ta’lim muassasalarining moddiy-texnik bazasini mustahkamlash uchun davlat budjeti va homiylar hisobidan jami 101,2 milliard so‘m mablag‘ ajratilgan. 2018—2021-yillarda 9 ta ta’lim muassasasida davlat budjeti hisobidan 28,9 milliard so‘mlik qurilish-ta’mirlash ishlari amalga oshirilgan.
Shuningdek, “Zamin” xalqaro jamoat fondi yordamida kar va zaif eshituvchi bolalar uchun ta’lim muassasalarida zamonaviy kompyuter sinf xonalari tashkil etilib, robototexnika jihozlari va o‘quv qo‘llanmalari yetkazilgan. 11 ta kar va zaif eshituvchi bolalar uchun ixtisoslashtirilgan maktab-internatlari eshitish uchun maxsus texnik jihozlar bilan jihozlangan. Ikki ming nafar kar va zaif eshituvchi bolalarga “Zamin” xalqaro jamoat fondi ko‘magida eshitish moslamalari o‘rnatilgan.
Bundan tashqari, Toshkent shahridagi ko‘zi ojiz bolalar maktab-internatida kompyuter markazi faoliyati yo‘lga qo‘yilgan. 14 ta ko‘zi ojiz bolalar uchun ixtisoslashtirilgan ta’lim muassasalari 3 ming dona maxsus jihozlar (grifel va pribor) bilan ta’minlangan. Barcha muassasalar yuqori tezlikdagi optik tolali internet bilan ta’minlangan.
Shuningdek, 2021/2022-o‘quv yilining o‘zida 214 nafar kasalligi yengil darajadagi o‘quvchilar inklyuziv ta’limga jalb qilinib, umumta’lim maktablariga joylashtirilgan. Tajriba-sinov tariqasida shaharlarda hamda Toshkent shahrining tumanlarida joylashgan bittadan umumta’lim maktablarida inklyuziv ta’lim tizimi joriy qilingan.
Ma’lum qilinishicha, imkoniyati cheklangan bolalar uchun ixtisoslashtirilgan ta’lim muassasalari o‘quvchilari uchun 360 nomda 324,5 ming nusxa darsliklar chop etilgan. Qo‘shimcha qilinishicha, o‘quv reja va dasturlar optimallashtirilib, o‘rtacha 12 foizga qisqartirilgan, uyda yakka tartibda ta’lim oluvchi o‘quvchilar uchun jami 11 ming 664 dona o‘quv qurollari yetkazilgan.
O‘quv jarayonini raqamlashtirish, qog‘ozbozlikni kamaytirish maqsadida ta’lim muassasalari raqamli ta’lim (elektron jurnal) platformasiga o‘tkazilgan.
Bundan tashqari, 2018—2021-yillardagi 6 348 nafar bitiruvchilarning 380 nafari kasb-hunar maktabiga, 9 nafari akademik litseyga, 62 nafari kollejlarga, 23 nafari texnikumlarga, 240 nafari oliy ta’lim muassasalariga qabul qilingan.
Izoh (0)