Belgiyada BA.4 nomini olgan koronavirusning omikron shtammining yangi varianti bilan ilk kasallanish holat qayd etildi. Bu haqda Leuven katolik universiteti virusologlari Mark Van Ranst va Pyet Mass ma’lum qildi, deb xabar beradi “Interfaks”.
“Viruslar mutatsiyalarni to‘playdi, ular doim shunday qiladi. Yangi variantlar hali yana paydo bo‘ladi”, — deydi Van Ranst.
Ekspertning tushuntirishicha, koronavirusning “mutlaqo yangi variantlaridan ko‘ra, omikronning quyi versiyalari ma’qul”.
Maqolada qayd etilishicha, omikronning BA.4 va BA.5 variantlari Janubiy Afrika, Botsvana, Germaniya, Daniya va Buyuk Britaniyada aniqlangan. Belgiyada omikronning BA.5 versiyasi hali aniqlanmagan.
Ta’kidlanishicha, omikron shtammining yangi variantlarining qator davlatlarda paydo bo‘lishi kasallanish, shifoxonaga murojaat qilishlar yoki o‘lim holatlarining sezilarli darajada ortishiga olib kelmagan.
Eslatib o‘tamiz, koronavirusning yangi omikron shtammi birinchi marta 2021-yilning 11-noyabr kuni Janubiy Afrikada topilgan. Britaniyalik olimlar yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkinligini ta’kidlagandi. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli omikronni xavfli deb tan olgan edi. 2022-yilning yanvar o‘rtalarida Shvetsiya janubidagi Uppsala shahrida omikron shtammining mutatsiya, fevral o‘rtalarida esa Polshada omikronning ikkita yangi varianti aniqlangandi.
Izoh (0)