Toshkentda Farmatsevtika instituti talabasi psixotrop moddalarni sotish bilan shug‘ullangani uchun 4 yilga qamaldi

Jinoyat ishlari bo‘yicha Chilonzor tuman sudida kuchli ta’sir qiluvchi ko‘p miqdordagi moddalarni sotishga uringan talaba qiz ustidan sud majlisi bo‘lib o‘tdi. Bu haqda “Yoshlar” telekanalining “Yangi davr” informatsion dasturida ma’lum qilindi.

Ma’lum qilinishicha, Toshkent davlat farmatsevtika institutining talabasi bo‘lgan sudlanuvchi noqonuniy daromad orttirish maqsadida noma’lum shaxsdan ko‘p miqdordagi “Tropikamid”, “Selofen” va “Regopen” dori vositalarini 4,55 million so‘mga sotib olgan.

Qiz dori vositalarini o‘zi vaqtinchalik yashash xonadoniga olib kelib, keyinchalik boshqa shaxslarga sotish maqsadida tayyorlab qo‘ygan. Olingan tezkor ma’lumotga asosan IIBB Jinoyat-qidiruv bo‘limi xodimlari tomonidan sudlanuvchining xonadonida o‘tkazilgan tezkor tadbir davomida ashyoviy dalillar topilgan.

Ta’kidlanishicha, sudlanuvchi dori vositalarini saqlab kelayotgani 2021-yilning 1-noyabr kuni aniqlangan. Jinoyat ishi qo‘zg‘atilganidan keyin tilxat ehtiyot chorasi qo‘llanib, qiz ochiqqa chiqarilgan. Lekin bundan o‘ziga xulosa qilmasdan, 2022-yilning 24-yanvar kungi tezkor tadbirda 24 dona “Tropikamid” va 170 dona “Regopen” dori vositalari bilan qo‘lga olingan.

“Sotish maqsadida olmagandim. Tanishim uni olib berishimni iltimos qilgandi. Keyin u viloyatga ketib qolgani uchun ularni uyimda saqlaganman… Bitta-yu bitta orzum — o‘qish, oilada uchta qizmiz. Yordam qiladigan aka-ukam yo‘q, otamning o‘ziga qiyin bo‘lgani uchun kontraktimga ozroq bo‘lsa ham yordam bo‘lsin degandim”, — deydi sudlanuvchi.

Yaqinda to‘yi bo‘lishi kerak bo‘lgan qizning so‘zlariga ko‘ra, u 158 million so‘m kontrakt to‘lashi kerak bo‘lgan.

Sud ayblanuvchining yoshligi, qiz bola ekani, ilgari qamalmaganini inobatga olib, unga 4 yil ozodlikdan mahrum qilish jazosini tayinlagan.

Avvalroq Andijonda psixotrop dorilarni 12 ming dollarga sotmoqchi bo‘lgan shaxs qo‘lga olingani, DXX Toshkentda narkolaboratoriya tashkil qilgan ikki kishini ushlagani, Andijonda psixotrop dori vositalarining noqonuniy savdosi bilan shug‘ullangan shaxslar qo‘lga olingani to‘g‘risida xabar berilgandi.