Samarqand viloyatida xalq ta’limi boshqarmasi boshlig‘i, uning o‘rinbosari va Nurobod tumani xalq ta’limi bo‘limi mudiri almashdi. Bu haqda “Daryo” muxbiri xabar berdi.
Viloyat hokimi o‘rinbosari Xurshid Ochilov ishtirokida viloyat xalq ta’limi boshqarmasida bo‘lib o‘tgan yig‘ilishda xalq ta’limi vaziri buyrug‘iga asosan Sultonov Shokir Quvonovich viloyat xalq ta’limi boshqarmasi boshlig‘i vazifasini bajaruvchi etib tayinlangan. Tayinlovga qadar Shokir Sultonov Paxtachi tumani xalq ta’limi bo‘limi mudiri vazifasida faoliyat yuritgan.
Shu vaqtga qadar Samarqand viloyati xalq ta’limi boshqarmasi boshlig‘i vazifasida ishlab kelgan Zebiniso Shodiyeva o‘z arizasiga ko‘ra ishdan olinib, 5-aprel kuni Samarqand shahridagi Pushkin nomli viloyat axborot-kutubxona markaziga rahbar etib tayinlangan.
Zebiniso Shodiyevaning nima sababdan ishdan olinganligi hech qayerda ochiqlanmagan.
Viloyat xalq ta’limi boshqarmasi boshlig‘i o‘rinbosari lavozimida faoliyat yuritib kelgan Jangirov Ozod Janiqulovich Nurobod tumani xalq ta’limi bo‘limi mudiri vazifasini bajaruvchi etib tayinlangan.
Nurobod tumani xalq ta’limi bo‘limi mudiri noutbuk mojarosi ortidan ishdan olingan edi.
Shuningdek, Yalg‘ashev Olimjon Rashidovich viloyat xalq ta’limi boshqarmasi boshlig‘i o‘rinbosari vazifasini bajaruvchi etib tayinlandi. Tayinlovga qadar Olimjon Yalg‘ashev TATU Samarqand filiali direktor o‘rinbosari vazifasida faoliyat yuritgan.
Izoh (0)