Rossiya don eksportini taqiqlaganidan so‘ng, Qozog‘iston ham don va un eksportini vaqtincha cheklash masalasini ko‘rib chiqmoqda. Bu haqda Qozog‘iston qishloq xo‘jaligi vaziri Yerbol Karashukeyevga tayanib, Reuters xabar bermoqda.
Karashukeyevning aytishicha, fermerlar o‘z mahsulotlarini eksport qilishdan oldin ichki talabni qondirishlari kerak.
Qozog‘iston odatda qo‘shni Markaziy Osiyo davlatlari va Afg‘onistonga don eksport qiladi; u, shuningdek, donning bir qismini Xitoyga va Qora dengiz portlariga jo‘natadi. Shu bilan birga, Qozog‘iston Rossiyadan cheklangan miqdorda bug‘doy import qiladi.
O‘zbekistonga qanday ta’sir qilishi mumkin?
Qozog‘iston — O‘zbekiston uchun asosiy bug‘doy import qiluvchi mamlakat hisoblanadi. Masalan, yanvar oyida mamlakatga 26,8 ming tonna bug‘doy kirib kelgan, uning deyarli barcha qismi (99,2 foiz) Qozog‘iston hisobiga to‘g‘ri keldi.Bundan tashqari, O‘zbekistonda 1-apreldan boshlab “Oziq-ovqat xavfsizligi va ichki bozorda narxlar barqarorligini ta’minlash bo‘yicha qo‘shimcha chora-tadbirlar to‘g‘risida”gi hukumat qarori kuchga kirdi.
Unda dunyo bozorlarida yuzaga kelgan keskin tebranishlarning ichki bozorni oziq-ovqat mahsulotlari bilan ta’minlashga salbiy ta’sirini kamaytirish, ichki bozorni bug‘doy, un va o‘simlik yog‘i mahsulotlari bilan uzluksiz va kafolatli ta’minlash maqsadida bir necha choralar belgilangan.
Hujjatga ko‘ra, 2022-yil aprel—iyul oylarida Qozog‘istondan 100 ming tonna 3-sinf bug‘doyi (bir qismi un) maqbul narxlarda import qilinadi.
Qishloq xo‘jaligi vazirligi va Iqtisodiy taraqqiyot va kambag‘allikni qisqartirish vazirligi ichki va tashqi bozorlardagi vaziyatdan kelib chiqib yana 500 ming tonna bug‘doyni import qilish zarurati yuzasidan asoslantirilgan taklif kiritadi.
2022-yil 1-apreldan boshlab yil yakuniga qadar import qilinadigan bug‘doy (un) va o‘simlik yog‘ini temiryo‘llar orqali tashishda 50 foizli imtiyozli tariflar qo‘llanadi.
Yuklarni vagonlardan tushirib olish muddati bo‘yicha qo‘llanadigan tariflar (prostoy) miqdori barcha turdagi bug‘doy importyorlariga dastlabki uch kun uchun 40 foizga pasaytiriladi.
Avvalroq Qishloq xo‘jaligi vazirligi O‘zbekistonda 2022-yilda bug‘doy va shakar mahsulotlarida barqarorlik ta’minlanishini ma’lum qilgan edi.
Izoh (0)