Жиноят ишлари бўйича Чилонзор туман судида кучли таъсир қилувчи кўп миқдордаги моддаларни сотишга уринган талаба қиз устидан суд мажлиси бўлиб ўтди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълум қилинишича, Тошкент давлат фармацевтика институтининг талабаси бўлган судланувчи ноқонуний даромад орттириш мақсадида номаълум шахсдан кўп миқдордаги «Тропикамид», «Селофен» ва «Регопен» дори воситаларини 4,55 миллион сўмга сотиб олган.
Қиз дори воситаларини ўзи вақтинчалик яшаш хонадонига олиб келиб, кейинчалик бошқа шахсларга сотиш мақсадида тайёрлаб қўйган. Олинган тезкор маълумотга асосан ИИББ Жиноят-қидирув бўлими ходимлари томонидан судланувчининг хонадонида ўтказилган тезкор тадбир давомида ашёвий далиллар топилган.
Таъкидланишича, судланувчи дори воситаларини сақлаб келаётгани 2021 йилнинг 1 ноябрь куни аниқланган. Жиноят иши қўзғатилганидан кейин тилхат эҳтиёт чораси қўлланиб, қиз очиққа чиқарилган. Лекин бундан ўзига хулоса қилмасдан, 2022 йилнинг 24 январь кунги тезкор тадбирда 24 дона «Тропикамид» ва 170 дона «Регопен» дори воситалари билан қўлга олинган.
«Сотиш мақсадида олмагандим. Танишим уни олиб беришимни илтимос қилганди. Кейин у вилоятга кетиб қолгани учун уларни уйимда сақлаганман… Битта-ю битта орзум — ўқиш, оилада учта қизмиз. Ёрдам қиладиган ака-укам йўқ, отамнинг ўзига қийин бўлгани учун контрактимга озроқ бўлса ҳам ёрдам бўлсин дегандим», — дейди судланувчи.
Яқинда тўйи бўлиши керак бўлган қизнинг сўзларига кўра, у 158 миллион сўм контракт тўлаши керак бўлган.
Суд айбланувчининг ёшлиги, қиз бола экани, илгари қамалмаганини инобатга олиб, унга 4 йил озодликдан маҳрум қилиш жазосини тайинлаган.
Аввалроқ Андижонда психотроп дориларни 12 минг долларга сотмоқчи бўлган шахс қўлга олингани, ДХХ Тошкентда нарколаборатория ташкил қилган икки кишини ушлагани, Андижонда психотроп дори воситаларининг ноқонуний савдоси билан шуғулланган шахслар қўлга олингани тўғрисида хабар берилганди.
Изоҳ (0)