Vazirlar Mahkamasining navbatdagi Rayosat majlisida davlat hokimiyati va boshqaruvi organlari faoliyatining ochiqligi, OAV va jamoatchilik bilan ishlash masalalari muhokama qilindi, deb xabar beradi hukumat matbuot xizmati.
Ma’lum qilinishicha, “Davlat hokimiyati va boshqaruvi organlari faoliyatining ochiqligi to‘g‘risida”gi qonun hamda prezidentning 2019-yil 27-iyundagi “Ommaviy axborot vositalari mustaqilligini ta’minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida” qarori ijrosi o‘rganilgan. Natijada ayrim vazirliklar va idoralar tomonidan ushbu hujjatlar talablarini bajarishda sustkashlikka yo‘l qo‘yilayotgani aniqlangan.
Jumladan, qonunning 5-moddasiga ko‘ra davlat hokimiyati va boshqaruvi organlari tomonidan davlat dasturlari hamda boshqa dasturlar ijrosi, budjet mablag‘laridan foydalanish, o‘tkazilgan ochiq tanlovlar (tenderlar) va kimoshdi savdolari, ommaviy tadbirlar to‘g‘risidagi ma’lumotlar rasmiy veb-saytlarda e’lon qilib borilishi kerak. Biroq deyarli barcha viloyatlar hokimliklari (Jizzax viloyatidan tashqari) veb-saytida dolzarb bo‘lgan ochiq ma’lumotlar va jamoatchilikni alohida qiziqtiradigan mavzular 1 oydan 3 oygacha yangilanmagan.
Qonunning 13-moddasiga ko‘ra veb-saytlarda axborotni yangilab borish davriyligi haftasiga bir martadan kam bo‘lmasligi kerak. Biroq o‘ndan ortiq davlat organi va tashkilotlari, jumladan, Xalq ta’limi vazirligi, Davlat soliq qo‘mitasi, Iste’molchilar huquqlarini himoya qilish agentligi, Qoraqalpog‘iston Respublikasi Vazirlar Kengashi, Qashqadaryo, Andijon, Xorazm viloyatlari va Toshkent shahar hokimliklari tomonidan ochiq ma’lumotlar 10 kundan 1 oygacha kechiktirib e’lon qilinmoqda.
Shuningdek, o‘rganilgan 204 ta tuman va shahar hokimliklarining 35 tasida rasmiy veb-sayti ishlamayapti. Jumladan, Qoraqalpog‘iston, Toshkent shahri, Andijon, Sirdaryo, Qashqadaryo, Xorazm, Surxondaryo, Samarqand, Namangan, Buxoro, Toshkent viloyatlarining ayrim shahar va tuman hokimligi saytlari ana shunday ahvolda.
Prezident qaroriga muvofiq, 280 dan ortiq davlat va xo‘jalik boshqaruvi organlarida birinchi marta axborot xizmati tashkil etilgan. 90 dan ortiq tashkilotda axborot xizmatlari tegishli maqom va shart-sharoitlari bilan qayta tashkil qilingan. Biroq haligacha ayrim vazirliklar va idoralar davlat rahbarining qarori talablarini bajarmay kelmoqda.
Misol uchun, 3 ta respublika tashkilotida axborot xizmati rahbari axborot siyosati masalalari bo‘yicha maslahatchi maqomiga ega emas. 10 ta vazirlik va idorada matbuot kotibi mehnatga haq to‘lash shartlariga ko‘ra tashkilot rahbari o‘rinbosariga tenglashtirilmagan.
Qayd etilishicha, Monopoliyaga qarshi kurashish qo‘mitasi, Toshkent shahri va Toshkent viloyati hokimliklarida matbuot kotibi lavozimi vakant. Hududlarda axborot xizmatlariga qo‘shimcha shtatlar ajratilmagani sababli o‘tkazilayotgan tadbirlar, yangiliklar tezkorlik bilan sifatli yoritilmayapti.
Majlisda Qishloq xo‘jaligi vazirligi rahbariyatiga tizimda ochiqlik siyosati qoniqarsizligi, Sirdaryo viloyati hokimligiga Guliston, Yangiyer shaharlari, Boyovut, Sayxunobod, Oqoltin, Sardoba va Mirzaobod tumanlari hokimliklarida axborot xizmati faoliyati yaxshi tashkil etilmagani ko‘rsatib o‘tilgan.
“Mamlakatimizda olib borilayotgan ochiqlik siyosati yuzasidan ishlarni yetarli tashkil etmagani, OAV va jamoatchilik bilan aloqalarni tizimli yo‘lga qo‘ymagani uchun Avtomobil yo‘llari qo‘mitasi raisi Abdurahmon Abduvaliyev va Andijon shahri hokimi Bahromjon Haydarov ogohlantirildi”, — deyiladi xabarda.
Eslatib o‘tamiz, 2019-yilning 2-avgust kuni O‘zbekiston Prezidenti Shavkat Mirziyoyev selektor majlisida hokimlarni keskin tanqid ostiga olib, ulardan xalq oldida kechirim so‘rashni talab qilgandi. Internetda tarqalgan audioyozuv oxirida Prezident hokimlarga ular blogerlarga hisobot berishi lozimligini aytgani aks etgan edi. 2020-yilning 25-dekabr kuni Toshkent shahrida bo‘lib o‘tgan O‘zbekiston yoshlari forumida Shavkat Mirziyoyev OAV va ochiqlik siyosati haqida so‘z yuritib, “jurnalist va blogerlarning ovozini eshitishga majburmiz”, deya ta’kidlagandi.
Izoh (0)