“Liverpul” Muhammad Salohga o‘rinbosarni “Bavariya”dan topdi. Unga “Real” va “Yuventus” ham xaridor

“Bavariya” futbolchisi Serj Gnabriga “Real”, “Liverpul” va “Yuventus” klublaridan qiziqish bo‘lmoqda.

Goal nashrining xabariga ko‘ra, “Bavariya” 26 yoshli futbolchi bilan yangi shartnoma borasida kelisha olmayapti. Myunxenliklar hujumchini jamoaning eng ko‘p maosh oluvchi futbolchilaridan biriga aylantirishi lozimligini tushunib turibdi. Gnabri hozirda yiliga 8 million yevro maosh oladi.

Myunxenliklar bilan amaldagi shartnomasi 2023-yilda o‘z nihoyasiga yetadigan Serjga Yevropaning top-klublari qiziqish bildirishni boshladi.

“Real” vingerning vakillari bilan aloqaga chiqqan. Madrid jamoasi 5 yildan buyon muntazam futbolchining o‘yinini kuzatib kelgan. Undan tashqari Serj “qaymoqranglilar” himoyachisi David Alaba bilan yaqin do‘st.

“Real”dan tashqari “Liverpul” va “Yuventus” ham hujumchining atrofidagi vaziyatni kuzatmoqda.

Ingliz jamoasi Gnabrini Muhammad Salohga o‘rinbosar sifatida ko‘rmoqda. Misrlik futbolchi “qizillar” bilan yangi bitim borasida kelisha olmayapti va katta ehtimol bilan jamoani tark etishi mumkin. “Liverpul” bosh murabbiyi Yurgen Klopp ham Serjning ashaddiy muxlisi hisoblanadi.

Transfer bozorida erkin agentlarga ko‘proq e’tibor qaratadigan “Yuventus” ham Gnabri nomzodini ko‘rib chiqmoqda. Turinliklar yozda hujumchini ijaraga olish borasida “Bavariya” bilan muzokara o‘tkazishi mumkin.

Serj Gnabri 2021/22-yilgi mavsum myunxenliklar safida barcha musobaqalarda 37 ta o‘yinda ishtirok etib, 14 ta gol va 7 ta golli uzatmaga mualliflik qildi.