“Rahmonovning o‘limi xizmat bilan bog‘liq emas”. Svetlana Ortiqova ish vaqtida vafot etgan xodimiga 951 mln so‘m nafaqa puli to‘lanishiga munosabat bildirdi

Svetlana Ortiqova ish vaqtida vafot etgan Bosh prokuratura vakili, marhum 33 yoshli Samir Rahmonovning turmush o‘rtog‘iga 951 million so‘m nafaqa puli to‘lab berilishi haqidagi xabarlarga munosabat bildirib, Samir Rahmonov ish vaqtida vafot etmaganini, shuningdek, marhumning o‘limi yuzasidan sudga murojaat qilgan ota ham bugungi kunda vafot etgani sabab sud bu haqdagi ishni yopish qarorini chiqarganini ma’lum qildi. Bosh prokuror o‘rinbosari bu haqda 31-mart kuni AOKAda bo‘lib o‘tgan matbuot anjumanida ma’lum qildi, deya xabar berdi “Daryo” muxbiri.

“Sog‘liqni saqlash vazirligi tibbiyot xodimlarining kasbiy malakasini rivojlantirish markazi tomonidan berilgan xulosaga ko‘ra, Bosh prokuratura xodimi o‘lim vaqtida ishxonada emas, ko‘p tarmoqli kasalxonada bo‘lgan. Yanvar oyida sud ishini tugatish to‘g‘risida qaror chiqqan. Chunki da’vogar Rahmonovning otasi vafot etgan. Bu qaror hali kuchda, hech kim uni muhokama ham qilgani yo‘q, uni bekor qilgani ham yo‘q. Sud tibbiy-ekspertizasidan o‘tkazish uchun murdani yorish kerak. Rahmonovning marhum otasi bunga rozilik bermagandi. U “murdaning ko‘rinishi nuqtayi nazaridan sud tibbiy xulosasini berasizlar” deb tilxat yozgan. Keyin ma’naviy zarar undirishda fuqarolik kodeksi bor. Kodeksning 1021-moddasiga ko‘ra, ma’naviy zararni aniqlashda uni yetkazuvchining aybini tasdiqlash kerak. Lekin bu ayb jinoyat ishi tergovoldi surishtiruv natijasida jinoyat protsessual kodeksining 83-modda, 2-qismi (reabilitatsiya uchun asoslar uning qilmishida jinoyat tarkibi bo‘lmasa) bilan xulosaga kelgan va bu o‘limda Bosh prokuraturaning aybi yo‘q. Xizmat bilan o‘lim bor bo‘lsa uning xizmat vazifasi bilan bog‘liq joyi bo‘lishi kerak. Bu qonunni men ishlab chiqmaganman, lekin u qonunga men itoat qilishga majburman. Rahmonovning o‘limi xizmat bilan bog‘liq emas, ekspertiza xulosasi ham shunday bo‘lgan”, — dedi Svetlana Ortiqova.

“Prokuratura to‘g‘risidagi qonunning 50 va 56-moddalariga (prokuratura organlari xodimlarining moddiy va ijtimoiy ta’minoti) asosan, marhumning oila a’zolariga yetarlicha moddiy yordam ko‘rsatilgan. Bosh prokuratura davlat budjetidan mablag‘ oladigan tashkilot. Agarda budjet intizomini siz bilan biz bajarmasak, milliard uyoqqa, milliard buyoqqa qilsak, unda shifokorlarga, o‘qituvchilarga ustamalar va oylikni, nafaqaxo‘rlarga nafaqasini kim to‘laydi? Nogironlarni kim himoya qiladi? Agarda Bosh prokuraturaning aybi bo‘lsa bajonidil ikkita qo‘lni ko‘taramiz va to‘laymiz. Lekin Toshkent shahar sudi 28-mart kuni e’lon qilgan, hali yozilmagan qarorga Bosh prokuratura o‘zining munosabatini bildiradi. Chunki Bosh prokuratura ish bo‘yicha taraf va protest bildirishga vakolati bor. E’tibor bergan bo‘lsangiz, Toshkent shahar sudining bayonotida sud o‘zining tashabbusi bilan da’vogarni ham o‘zgartirdi, da’vo talabini ham o‘zgartirdi, deyilgan. Bunda ham fuqarolik protsessual kodeksining 124-moddasi (ish yuritishni tugatish asoslari) talablari buzilgan. Sud o‘z tashabbusi bilan amaldagi sud qarori mavjud bo‘la turib uni hech kim bekor qilmaganini inobatga olmasdan, o‘z tashabbusi bilan da’vogarni almashtirdi, da’vo talabani almashtirishga haqqi yo‘q. Men buni o‘zim nazorat qilaman, kerak bo‘lsa Oliy sudgacha bosh prokuror o‘rinbosari sifatida takroran kassatsiya keltirishga tayyorman”, — dedi Ortiqova Bosh prokuror o‘rinbosari.

Toshkent shahar sudlari tarqatgan xabarga munosabat bildirgan Bosh prokuratura xabar shoshma-shosharlikda tarqatilganini aytib, sud qarorining asosliligi Bosh prokuratura tomonidan atroflicha o‘rganilishini va bu yakuniy qaror bo‘lmasligini bildirdi.

Eslatib o‘tamiz, O‘zbekiston Bosh prokuraturasi jamoatchilik bilan aloqalar va huquqiy axborot bo‘limi prokurori lavozimida ishlab kelgan Samir Rahmonov 2021-yil 26-aprel kuni 33 yoshida vafot etgandi. Oliy Majlis Qonunchilik palatasi deputati Rasul Kusherbayev marhumning otasi deputatga murojaat qilib, o‘g‘li xizmat vazifasini bajarayotgan vaqtda ish joyida vafot etgani, to‘rt nafar voyaga yetmagan farzandlari boquvchisiz qolsa-da, uning oilasiga qonunga asosan kafolatlangan nafaqa pullari to‘lab berilmayotganini bildirganini ma’lum qilgan edi.