O‘zbekistonda davlat dasturlaridan tashqari budjetdan ssuda berish va banklarga depozit qo‘yish to‘xtatiladi

Shavkat Mirziyoyev hudud va tarmoqlar rahbarlariga 1-apreldan boshlab davlat dasturlaridan tashqari budjetdan ssuda berish va banklarga depozit qo‘yishni to‘xtatishga topshiriq berdi. Bu haqda Prezident matbuot kotibi xabar qildi.

Qayd etilishicha, 31-mart kuni o‘tkazilgan videoselektor yig‘ilishida har bir tarmoq va hudud rahbari bugundanoq aniq hisob-kitob qilib, uch kun muddatda o‘z rejalarini ishlab chiqishi kerakligi ko‘rsatib o‘tilgan. Soliq va Bojxona qo‘mitalariga tushumlarni ta’minlash yuzasidan tegishli topshiriqlar berilgan.

Bundan tashqari, o‘tgan haftada 1,5 mingdan ziyod davlat mulkini savdoga chiqarish bo‘yicha imzolangan Prezident qarori ijrosini ta’minlash bilan bog‘liq vazifalar belgilab berilgan.

Ta’kidlanishicha, 2022-yil 1-mayga qadar 50 mingta (4,5 ming gektar) yer uchastkalarini savdoga chiqarish nazarda tutilgan. Biroq Samarqandda hozirgi kungacha bor-yo‘g‘i 6 ta yer uchastkasi elektron savdolarga qo‘yilgan. Qolgan hududlarda esa bironta yer uchastkasi savdoga chiqarilmagan. Ikki hafta muddatda ushbu yerlarni to‘liq auksionga chiqarib, 1-iyulga qadar ularning kamida 50 foizi sotilishini ta’minlash vazifasi qo‘yilgan.

“Yana bir muhim masalaga e’tiboringizni qaratmoqchiman. Xalqaro moliya bozoridagi hozirgi nobarqaror vaziyatda chetdan mablag‘ jalb qilish nihoyatda qiyin bo‘ladi. Bunday sharoitda o‘zimizda bor resurslardan samarali va to‘liq foydalanish shart”, — degan prezident.

Hozirgi kunga qadar qiymati 9 milliard dollar bo‘lgan 105 ta loyiha doirasida jalb etilgan mablag‘lar ishlatilmasdan turgani yoki cho‘zilayotgani ko‘rsatib o‘tilgan. Bir oy muddatda har bir loyihani o‘rganib, ularni jadallashtirish topshirilgan. Bunda samarasiz va istiqbolsiz loyihalarni tugatish bo‘yicha takliflar tayyorlanadi.