«Раҳмоновнинг ўлими хизмат билан боғлиқ эмас». Светлана Ортиқова иш вақтида вафот этган ходимига 951 млн сўм нафақа пули тўланишига муносабат билдирди

Светлана Ортиқова иш вақтида вафот этган Бош прокуратура вакили, марҳум 33 ёшли Самир Раҳмоновнинг турмуш ўртоғига 951 миллион сўм нафақа пули тўлаб берилиши ҳақидаги хабарларга муносабат билдириб, Самир Раҳмонов иш вақтида вафот этмаганини, шунингдек, марҳумнинг ўлими юзасидан судга мурожаат қилган ота ҳам бугунги кунда вафот этгани сабаб суд бу ҳақдаги ишни ёпиш қарорини чиқарганини маълум қилди. Бош прокурор ўринбосари бу ҳақда 31 март куни АОКАда бўлиб ўтган матбуот анжуманида маълум қилди, дея хабар берди «Дарё» мухбири.

«Соғлиқни сақлаш вазирлиги тиббиёт ходимларининг касбий малакасини ривожлантириш маркази томонидан берилган хулосага кўра, Бош прокуратура ходими ўлим вақтида ишхонада эмас, кўп тармоқли касалхонада бўлган. Январь ойида суд ишини тугатиш тўғрисида қарор чиққан. Чунки даъвогар Раҳмоновнинг отаси вафот этган. Бу қарор ҳали кучда, ҳеч ким уни муҳокама ҳам қилгани йўқ, уни бекор қилгани ҳам йўқ. Суд тиббий-экспертизасидан ўтказиш учун мурдани ёриш керак. Раҳмоновнинг марҳум отаси бунга розилик бермаганди. У «мурданинг кўриниши нуқтаи назаридан суд тиббий хулосасини берасизлар» деб тилхат ёзган. Кейин маънавий зарар ундиришда фуқаролик кодекси бор. Кодекснинг 1021-моддасига кўра, маънавий зарарни аниқлашда уни етказувчининг айбини тасдиқлаш керак. Лекин бу айб жиноят иши терговолди суриштирув натижасида жиноят процессуал кодексининг 83-модда, 2-қисми (реабилитация учун асослар унинг қилмишида жиноят таркиби бўлмаса) билан хулосага келган ва бу ўлимда Бош прокуратуранинг айби йўқ. Хизмат билан ўлим бор бўлса унинг хизмат вазифаси билан боғлиқ жойи бўлиши керак. Бу қонунни мен ишлаб чиқмаганман, лекин у қонунга мен итоат қилишга мажбурман. Раҳмоновнинг ўлими хизмат билан боғлиқ эмас, экспертиза хулосаси ҳам шундай бўлган», — деди Светлана Ортиқова.

«Прокуратура тўғрисидаги қонуннинг 50 ва 56-моддаларига (прокуратура органлари ходимларининг моддий ва ижтимоий таъминоти) асосан, марҳумнинг оила аъзоларига етарлича моддий ёрдам кўрсатилган. Бош прокуратура давлат бюджетидан маблағ оладиган ташкилот. Агарда бюджет интизомини сиз билан биз бажармасак, миллиард уёққа, миллиард буёққа қилсак, унда шифокорларга, ўқитувчиларга устамалар ва ойликни, нафақахўрларга нафақасини ким тўлайди? Ногиронларни ким ҳимоя қилади? Агарда Бош прокуратуранинг айби бўлса бажонидил иккита қўлни кўтарамиз ва тўлаймиз. Лекин Тошкент шаҳар суди 28 март куни эълон қилган, ҳали ёзилмаган қарорга Бош прокуратура ўзининг муносабатини билдиради. Чунки Бош прокуратура иш бўйича тараф ва протест билдиришга ваколати бор. Эътибор берган бўлсангиз, Тошкент шаҳар судининг баёнотида суд ўзининг ташаббуси билан даъвогарни ҳам ўзгартирди, даъво талабини ҳам ўзгартирди, дейилган. Бунда ҳам фуқаролик процессуал кодексининг 124-моддаси (иш юритишни тугатиш асослари) талаблари бузилган. Суд ўз ташаббуси билан амалдаги суд қарори мавжуд бўла туриб уни ҳеч ким бекор қилмаганини инобатга олмасдан, ўз ташаббуси билан даъвогарни алмаштирди, даъво талабани алмаштиришга ҳаққи йўқ. Мен буни ўзим назорат қиламан, керак бўлса Олий судгача бош прокурор ўринбосари сифатида такроран кассация келтиришга тайёрман», — деди Ортиқова Бош прокурор ўринбосари.

Тошкент шаҳар судлари тарқатган хабарга муносабат билдирган Бош прокуратура хабар шошма-шошарликда тарқатилганини айтиб, суд қарорининг асослилиги Бош прокуратура томонидан атрофлича ўрганилишини ва бу якуний қарор бўлмаслигини билдирди.

Эслатиб ўтамиз, Ўзбекистон Бош прокуратураси жамоатчилик билан алоқалар ва ҳуқуқий ахборот бўлими прокурори лавозимида ишлаб келган Самир Раҳмонов 2021 йил 26 апрель куни 33 ёшида вафот этганди. Олий Мажлис Қонунчилик палатаси депутати Расул Кушербаев марҳумнинг отаси депутатга мурожаат қилиб, ўғли хизмат вазифасини бажараётган вақтда иш жойида вафот этгани, тўрт нафар вояга етмаган фарзандлари боқувчисиз қолса-да, унинг оиласига қонунга асосан кафолатланган нафақа пуллари тўлаб берилмаётганини билдирганини маълум қилган эди.