31-mart kuni O‘zbekiston tashqi ishlar vaziri o‘rinbosari Vladimir Norov Birlashgan Millatlar Tashkilotining Afg‘onistondagi gumanitar majburiyatlar bo‘yicha onlayn-konferensiyasida ishtirok etdi. Bu haqda TIV matbuot xizmati xabar berdi.

Anjuman BMT tomonidan Buyuk Britaniya, Germaniya va Qatar hukumatlari bilan birgalikda BMTning Afg‘onistondagi gumanitar faoliyatini moliyalashtirish uchun donorlik mablag‘larini safarbar qilish va ushbu mamlakatdagi gumanitar inqirozga xalqaro hamjamiyat e’tiborini jalb qilish maqsadida tashkil etilgan.

Tadbir ochilishida BMT Bosh kotibi Antonio Guterrish va tashkilotchi mamlakatlarning tashqi siyosat idoralari rahbarlari so‘zga chiqqan. Yalpi majlis doirasida Afg‘onistondagi hozirgi gumanitar vaziyat, jumladan, xotin-qizlar va bolalar ahvoliga alohida urg‘u berilgan holda muhokama qilingan.

O‘zbekiston tashqi ishlar vazirining o‘rinbosari Vladimir Norov o‘z nutqida, O‘zbekistonning Afg‘onistondagi vaziyatni barqarorlashtirish va mamlakat muvaqqat hukumati bilan hamkorlikni yo‘lga qo‘yish borasidagi pozitsiyasi va qarashlarini tilga olgan.

“Dunyoda ro‘y berayotgan voqealar munosabati bilan, afsuski, xalqaro hamjamiyatning Afg‘onistonga e’tibori biroz pasayganini ko‘ryapmiz. Darhaqiqat, afg‘on masalasi jahon siyosati foniga ikkinchi darajaga tushib qoldi. Bunga yo‘l qo‘yib bo‘lmaydi. Xalqaro hamjamiyat ushbu davlatning buguni va kelajagi uchun javobgar bo‘lishi kerak.

Hozirda mazkur davlat o‘z rivojlanishining hal qiluvchi bosqichida. Yo bu davlat jahon hamjamiyatining yordami bilan normal iqtisodiyot va taraqqiyot poydevorini qurish uchun shart-sharoit yaratadi yoki yana terroristik va ekstremistik tashkilotlarning boshpanasiga aylanadi”, — deydi Norov.

Shuningdek, O‘zbekiston tomonidan afg‘on xalqiga gumanitar yordam ko‘rsatish borasida amalga oshirilayotgan aniq chora-tadbirlar to‘g‘risida ma’lumot berilgan. Afg‘onistonga ko‘maklashish bo‘yicha xalqaro sa’y-harakatlarni safarbar qilish va muvofiqlashtirishda BMTning faol ishtirok etishi muhimligi qayd etilgan.

Eslatib o‘tamiz, tashqi ishlar vaziri Abdulaziz Komilov 2021-yil 8-sentabr kuni Afg‘oniston masalasi bo‘yicha 20 dan ortiq TIV rahbarlari ishtirokida bo‘lib o‘tgan uchrashuvda Afg‘oniston uchun mojarolardan keyingi strategiyani ishlab chiqish, jumladan, uning iqtisodiyotini tiklash, mamlakatni mintaqaviy integratsion jarayonlarga jalb qilish, infratuzilma loyihalarini amalga oshirish zarurligiga e’tibor qaratgandi. “Tolibon” rasmiysi 7-oktabr kuni Kobulda O‘zbekiston tashqi ishlar vaziri Abdulaziz Komilov bilan o‘tkazilgan muzokaralar davomida O‘zbekiston xavfsizligiga Afg‘oniston hech qanday tahdid bo‘lmasligini aytgandi.