Ukrainalik diplomatlar Litva, Latviya va Estoniyadan Rossiya hamda Belarus uchun quruqlikdagi chegaralarni yopishni so‘radi. Bu haqda Ukrainaning Polshadagi elchisi Andrey Deshitsaga tayanib, “Ukrinform” ma’lum qildi.
“O‘ylaymanki, bu kabi qaror qabul qilinsa, Yevropa Ittifoqi qarorini kutib o‘tish kerak bo‘lmaydi — biz Rossiyani har qanday yetkazib berishlardan to‘sib qo‘yamiz”, — deydi Deshitsa.
Uning qo‘shimcha qilishicha, Ukraina, shuningdek, Polsha hukumatidan Polsha—Belarus chegarasini yopishni so‘raydi.
25-mart kuni Ukraina infratuzilma vaziri Yevropa Ittifoqiga Rossiya va Belarus bilan quruqlikdagi va dengiz transport aloqalarini bloklashni so‘ralgan murojaat yo‘llanganini ma’lum qilgandi. Bu Rossiyaga ikki xil maqsadlarda, xususan, harbiy yo‘nalishlarda foydalanish mumkin bo‘lgan tovarlarni yetkazib berishni to‘xtatishga imkon beradi.
Ukrainada urush boshlangach, Polsha, Litva, Latviya va Estoniya Yevropa Ittifoqining boshqa davlatlari kabi Rossiya bilan aviaqatnovlarni to‘xtatgandi (YI osmoni Belarus samolyotlari uchun undan oldinroq yopilgandi). Shu bilan birga Estoniya davlat boshqaruv vaziri mamlakat Rossiya bilan quruqlikdagi chegaralarni yopish niyatida emasligini ma’lum qilgan.
Ukraina prezidenti Vladimir Zelenskiy bir necha bor Rossiya kemalari uchun Yevropa portlarini yopishni so‘ragan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)