Armaniston favqulodda vaziyatlar vaziri Andranik Piloyan korrupsiyada gumon qilinib hibsga olindi. Bu haqida “Joxovurd” xabar berdi.
Gazeta ma’lumotlariga ko‘ra, Armaniston korrupsiyaga qarshi kurashish qo‘mitasi FVVning ayblov e’lon qilingan 150 ga yaqin mansabdorini so‘roq qilgan, 5 nafar xodim hibsga olingan.
FVV xodimlari bir qator korrupsiyaviy kelishuvlarda, xususan, vazirlikda turli lavozimlarni egallash uchun pora olishda ishtirok etganlikda, Piloyan ham mazkur korrupsiyaviy zanjirning bir halqasi bo‘lgani gumon qilinmoqda.
Armaniston korrupsiyaga qarshi kurashish qo‘mitasining vakillari Piloyanning hibsga olinganini tasdiqlagan, deb yozmoqda Sputnik Armaniston.
Piloyan FVV rahbari lavozimiga tayinlanguniga qadar 20 yil davomida, ya’ni 2020-yil noyabrgacha respublika Mudofaa vazirligida ishlagan. U Armaniston qurolli kuchlari safiga 1993-yilda qabul qilingan. Dastlab razvedka bo‘linmasi boshlig‘i sifatida faoliyat olib borib, keyinchalik o‘qchilar polki komandiri lavozimigacha ko‘tarilgan.
1998-yilda Armaniston Mudofaa vazirligi harbiy qismlaridan birida xizmatni boshlab, 2020-yilga borib harbiy birlashma komandiri lavozimida ishlagan. Piloyan 2020-yil iyul oyida general-mayor unvonini olgandi.
Shuningdek, 2020-yil oktabrda Tog‘li Qorabog‘dagi harbiy nizoda, janubiy front Arsaxdagi janglarda ishtirok etgan. Shu yili 22-oktabrda Piloyan Armaniston milliy qahramoni unvoniga sazovor bo‘lgan.
Eslatib o‘tamiz, 2022-yil 27-mart kuni Tog‘li Qorabog‘ hukumati harbiy holat e’lon qilgan, biroq Ozarbayjon Tog‘li Qorabog‘dan qo‘shinlarini olib chiqish haqidagi Rossiya chaqirig‘ini rad etdi hamda u yer o‘z hududi ekanini bildirgan. 28-martda Rossiya Ozarbayjon o‘z qo‘shinlarini Tog‘li Qorabog‘dagi qishloqdan olib ketganini ma’lum qildi, ammo Boku buni rad etgan.