Qisman tan olingan Janubiy Osetiya respublikasi Rossiyaga qo‘shilish uchun tez orada “qonuniy qadamlar”ni qo‘yadi. Bu haqda respublika prezidenti Anatoliy Bibilov ma’lum qildi, uning murojaati “Yagona Rossiya” saytida e’lon qilingan.
“Rossiya bilan birlashish bizning strategik maqsadimiz, deb hisoblayman. Bizning yo‘l. Odamlarning intilishlari. Va biz bu yo‘ldan boramiz. Yaqin kunlarda tegishli qonuniy choralar ko‘ramiz. Janubiy Osetiya respublikasi o‘zining tarixiy vatani – Rossiyaning bir qismi bo‘ladi”, — degan Bibilov.
Uning matbuot xizmati Janubiy Osetiyaning Rossiya tarkibiga kirishi bo‘yicha barcha qonuniy tartib-qoidalar respublikada 10-aprel kuni bo‘lib o‘tadigan prezidentlik saylovlaridan so‘ng yakunlanishini ma’lum qilgan.
Qisman tan olingan Abxaziya respublikasining parlament spikeri Valeriy Kvarchiya esa respublika Rossiya tarkibiga kirmoqchi emasligini aytdi. “Abxaziyaning Rossiya Federatsiyasi tarkibiga qo‘shilishi haqida gap yo‘q. Abxaziya konstitutsiyasida mamlakatimiz mustaqil davlat deb e’lon qilingan”, — deya uning so‘zlaridan iqtibos keltirgan “Interfaks”. Shu bilan birga, Kvachiya “Abxaziya konstitutsiyasi, xususan respublika mustaqilligini tugatish haqida gap ketganda o‘zgartirilishi mumkinligini” qo‘shimcha qildi.
O‘zini o‘zi respublika deb e’lon qilgan Lugansk rahbari Leonid Pasechnik 27-mart kuni yaqin orada respublikada Rossiya tarkibiga qo‘shilish bo‘yicha referendum o‘tkazilishini ma’lum qilgandi. Keyinroq u hozir hech kim referendumga tayyorgarlik ko‘rmayotgani, chunki asosiy maqsad “urushni tugatish” ekani haqida bayonot berdi.
29-mart kuni Donetsk rahbari Denis Pushilin ham Rossiyaga qo‘shilish masalasi ko‘rib chiqilishi haqida ma’lum qildi. “Ammo hozir asosiy vazifa respublikaning konstitutsiyaviy chegaralariga yetib borishdir. Qarorni keyin qabul qilamiz”, — deya qo‘shimcha qildi Pushilin.
29-mart kuni Rossiya Mudofaa vaziri Sergey Shoygu Ukrainadagi maxsus harbiy operatsiyaning asosiy vazifalari bajarilganini, shuning uchun endi asosiy maqsad – Donbassni ozod qilishga e’tibor qaratish imkoniyati borligini aytdi.
Izoh (0)