«Толибон» томонидан шакллантирилган Афғонистон ҳукуматининг биринчи дипломати «ўтган ой» Москвага келган ва Россия Ташқи ишлар вазирлигида аккредитация олган. Бу ҳақда Россия ташқи ишлар вазири Сергей Лавров маълум қилди, деб хабар беради «Интефакс».
Унинг фикрича, «бошқарув тажрибасининг етишмаслиги, молия-иқтисодий чекловлар, АҚШ ва унинг иттифоқчилари томонидан сиёсий-дипломатик босимлар»га қарамай, Афғонистоннинг янги ҳукумати «умуман олганда, давлатни барқарор бошқаришни уддаламоқда».
Лавров жаҳон ҳамжамиятини Афғонистоннинг янги ҳукумати билан фаолроқ ҳамкорлик қилишга чақирган. Ташқи ишлар вазирининг ҳисоблашича, «Толибон» ҳукуматининг расман тан олинишига асосий тўсиқ унинг вакиллик қобилиятининг йўқлиги бўлиб қолмоқда. «Мен ҳокимиятда нафақат мамлакатнинг турли этник гуруҳлари, миллий ва конфессиявий озчиликлар, балки сиёсий кучлар манфаатларини ҳимоя қиладиган шахсларнинг йўқлигини назарда тутяпман», — дея тушунтиради у.
Эслатиб ўтамиз, «Толибон» ҳаракати 2021 йилнинг августида АҚШ ва НАТО кучлари Афғонистонни тарк этиши фонида ҳокимият тепасига келган эди.
Аввалроқ «Толибон» томонидан шакллантирилган Афғонистон ҳукумати Қирғизистондан афғон қишлоқ хўжалиги маҳсулотларини Россия бозорига экспорт қилишда ёрдам сўраган эди.
Изоҳ (0)