БМТнинг болалар фонди ЮНИСЕФ 24 февралдан бери, яъни Россия Украина ҳудудида ҳарбий операцияларни бошлагандан кейин мамлакатдан 2 миллион атрофида бола чиқиб кетганини маълум қилди.
ЮНИСЕФ маълумотларига кўра, ҳарбий низо оқибатида 100 дан зиёд бола ҳалок бўлган, 130 нафар вояга етмаганлар эса турли даражада жароҳатлар олган.
1,1 миллиондан зиёд болалар Польшага, қолган 100 минг болалар эса Руминия, Молдова, Венгрия, Словакия ва Чехияга олиб борилган, деб хабар бермоқда ЮНИСЕФга таяниб CNN.
Украина ҳудудида 2,5 миллиондан зиёд бола бошқа хавфсиз ерга кўчиб ўтган. CNN БМТнинг зўравонликлар сабаб болалар савдоси ва уларни қул қилиб ишлатиш ҳолатлари кўпайиши ҳақида огоҳлантирганини қайд этган. ЮНИСЕФ бу каби хавфларнинг олдини олиш учун украиналик қочоқларнинг оилалари учун турли таҳдидлардан ҳоли жойлар ҳозирлаш зарурлиги юзасидан тавсиялар берган.
БМТ маълумотлари бўйича Украинадаги урушда 1189 нафар тинч аҳоли вакиллари ҳалок бўлган, 1901 киши яраланган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)