“Kamp Nou”da o‘tkazilgan ayollar o‘rtasidagi “El-Klasiko”ga 91,5 ming tomoshabin keldi. Bu jahon rekordi

Ayollar futboli bo‘yicha “Barselona” va “Real” o‘rtasidagi Chempionlar Ligasi chorak final uchrashuvida jahon rekordi qayd etildi.

Uchrashuvda kataloniyaliklar 5:2 hisobida g‘alaba qozondi. O‘yinni tomosha qilish uchun “Kamp Nou” stadioniga 91 553 muxlis tashrif buyurdi. Ayollar futboli tarixida hech qachon buncha tashrif qayd etilmagan.

Avvalgi rekord Pasadina shahrida bo‘lib o‘tgan JCh—1999 final bahsida qayd etilgandi. AQSh va Xitoy o‘rtasidagi finalni ko‘rish uchun 90 185 tomoshabin stadionga kelgan.

Qayd etish kerak, “Barselona” va “Real” ayollar jamoalari “Kamp Nou”da ilk bor o‘zaro to‘qnash keldi.

“Barselona” ayollar jamoasi ikki o‘yin natijasiga ko‘ra “Real”ni 8:3 hisobida mag‘lub etib, Chempionlar Ligasi yarim finaliga yo‘l oldi.