Rasman: Ruud van Nistelroy “PSV” bosh murabbiyiga aylanadi

Ruud van Nistelroy 2022/23-yilgi mavsumdan boshlab “PSV”ni boshqaradi.

Hozirda “PSV-2” bosh murabbiyi bo‘lib turgan 45 yoshli mutaxassis asosiy jamoa bilan 2025-yil yoziga qadar mo‘ljallangan shartnoma imzoladi.

“Manchester Yunayted” va “Real” sobiq hujumchisi yozda jamoani tark etadigan Roger Shmidtning o‘rnini egallaydi.

“Tvente”, “Shalke-04”, “PSV” va “Feyenoord”ning sobiq murabbiyi Fred Rutten Nistelroyning yordamchisi bo‘ladi. Shuningdek, 2018—2021-yillar mobaynida “Everton”da ishlagan “PSV” sobiq sport direktori Marsel Brands klubga qaytadi.

Ruud van Nistelroy 1993-yildan 2012-yilga qadar futbolchilik faoliyatini olib borgan. Shu yillar mobaynida niderlandiyalik “Den Bosx”, “Herenven”, “PSV”, “Manchester Yunayted”, “Real”, “Gamburg” va “Malaga” kabi jamoalarda to‘p surgan.

“PSV” 2021/22-yilgi mavsum Niderlandiya chempionatida 27 turdan so‘ng 2-pog‘onadan joy olgan. 1-o‘rindagi “Ayaks”dan 2 ochko ortda qolmoqda.