Shimoliy Amerika mintaqasida JCh—2022 saralashining so‘nggi turidan o‘rin olgan o‘yinlar bo‘lib o‘tdi.
Meksika terma jamoasi Salvadorni mag‘lubiyatga uchratib (2:0), ketma-ket 8-marta va o‘z tarixida 17-marta mundialga yo‘l oldi.
AQSh esa Kosta-Rikaga yutqazib qo‘ydi (0:2). Har ikki jamoa 25 ochkodan jamg‘ardi, biroq amerikaliklar qo‘shimcha ko‘rsatkichlar bo‘yicha 3-o‘rinni qo‘lga kiritdi.
AQSh 11-marta JCh final bosqichiga yo‘l oldi, so‘nggi bor jamoa 2014-yilgi musobaqada qatnashgandi.
To‘rtinchi o‘rinni olgan Kosta-Rika o‘tish o‘yinida Okeaniya mintaqasi g‘olibi Yangi Zelandiya bilan bahs yuritadi. O‘yin 13 yoki 14-iyun kuni bo‘lib o‘tadi.
Avvalroq KONKAKAF mintaqasidan Kanada birinchi bo‘lib Qatarga yo‘l olgandi.
Shu tariqa Jahon Chempionatiga yo‘llanma olgan jamoalar soni 29 taga yetdi. Musobaqa 2022-yilning 21-noyabridan 19-dekabriga qadar davom etadi. Avvalroq Qatar (mezbon), Xorvatiya, Germaniya, Daniya, Braziliya, Argentina, Ekvador, Urugvay, Belgiya, Fransiya, Ispaniya, Serbiya, Angliya, Shveysariya, Niderlandiya, Eron, Janubiy Koreya, Yaponiya, Saudiya Arabistoni, Kanada, Portugaliya, Polsha, Gana, Senegal, Marokash, Tunis, Kamerun kabi jamoalar masalani hal qilgandi.
Izoh (0)