Diyor Imomxo‘jev Professional futbol ligasi (PFL) bosh direktori lavozimiga tasdiqlandi. Bu haqda tashkilot matbuot xizmati ma’lum qildi.
31-mart kuni PFL Ijroqo‘mining yig‘ilishi bo‘lib o‘tdi. Yig‘ilishda tashkilot bosh direktori lavozimiga O‘FA prezidenti kiritgan taqdimnomaga asosan Diyor Imomxo‘jayev nomzodini tasdiqlash masalasi ko‘rib chiqilgan.
Ijroqo‘mning barcha a’zolari Imomxo‘jayev nomzodini bosh direktorlikka tasdiqlashga ovoz bergan. Diyor Imomxo‘jayev 4 yil muddatga Professional futbol ligasi bosh direktorligiga tasdiqlangan.
Eslatib o‘tamiz, Imomxo‘jayev 2020-yilning 25-mayidan beri PFL bosh direktori vazifasini bajaruvchi sifatida ishlab kelayotgandi.
Diyor Imomxo‘jayev 1989-yilda Toshkent shahrida tug‘ilgan. U O‘zbekiston davlat jahon tillari universitetining xalqaro jurnalistika bo‘limida tahsil olgan. Sport jurnalisti sifatida “Navro‘z” radiosi, “Chempion”, “Stadion” hamda “Erudit-Sport” gazetalari va MTRKda faoliyat yuritgan. Imomxo‘jayev 2016—2018-yillar mobaynida “Daryo” internet nashrida sport bo‘limi muharriri lavozimida ishlagan.
2018-yildan Imomxo‘jayev PFLda bosh direktor yordamchisi sifatida ish boshlagan.
Izoh (0)