Futbol tarixidagi “yovuz odam”lardan biri bo‘lgan Serxio Ramos 30-mart kuni 36 yoshni qarshi oldi. G‘alaba uchun hech narsadan tap tortmasligi va maydonda bamisoli jangchidek harakat qilgani uchun unga yuqoridagi ta’rif berilgani hech kimga sir emas. Ramos garchi faoliyatini “Sevilya”da boshlagan bo‘lsa-da, “Real” va uning nomi har doim yonma-yon kelgan. Haqiqatan ham Serxio aynan “qirollik klubi” safidagi faoliyati bilan dunyo futbolini zabt etgan. 16 mavsum, 671 o‘yin, 101 gol va 22 ta sovrin. Shunchaki aql bovar qilmas raqamlar. To‘rtta Chempionlar Ligasi bosh sovrini va beshta Ispaniya chempionati Kubogi Serxio madridliklarga taqdim etgan asosiy sovrinlardandir.
Bundan tashqari, Ramosning Ispaniya terma jamoasidagi faoliyati ham alohida va cheksiz so‘z yuritish mumkin bo‘lgan mavzu. U “qizil furiya” tarkibida ikki karra Yevropa chempioni (2008, 2012-yillarda) va bir marta jahon chempioni (2010) bo‘lgan. Ma’lumki, Ispaniya terma jamoasida deyarli barcha davrlarda raqobat kuchli bo‘lgan, ammo garddekkina bo‘rttirish bo‘lsa ham bu raqobatning Ramosga aloqasi yo‘qligini aytish mumkin.
Ammo hayotda har doim ham hammasi bir tekis davom etmaydi. 2020/21-yilgi mavsum so‘ngida Ramos jiddiy jarohat orttirib oldi va uzoq muddatga safdan chiqdi. Aynan shu sabab u Yevro—2020 ni o‘tkazib yubordi. Ramos bu jarohatdan haligacha tamomila qutulgani yo‘q va “PSJ” tarkibida ham o‘ynab ketolmayapti. “Real”ning u bilan qanday xayrlashgani esa ortiqcha izohga hojat qoldirmaydigan mavzu. “Daryo” esa quyida tug‘ilgan kunini nishonlayotgan Ramosning futbol va hayot haqidagi eng mashhur iqtiboslarini taqdim etadi.
Jasorat haqidaDunyoni jasur va tavakkal qilishdan qo‘rqmaydigan insonlar zabt etadi. Agar harakat qilmasangiz, hech narsaga erisholmaysiz. Tavakkal qilsangiz esa hech narsasiz qolishingiz yoki g‘alaba qozonishingiz mumkin. Nima bo‘lganda ham muvaffaqiyatga erishish imkoniyati yuqoriroqdir. Bunga ishonaman. Inson qiyin damlarda o‘zini yaxshiroq bilib oladi, stressli vaziyatlarda esa ko‘proq narsaga erishishi mumkin, bu bizni kuchliroq qiladi.
2018-yilgi Chempionlar Ligasi finali haqidaChempionlar Ligasi finali hammaning yodida, lekin oilam va farzandlarimga o‘lim bilan tahdid qilinganini hech kim eslamaydi.
Salohning jarohati? Bu meni umuman bezovta qilmaydi. Hamkasbimni jarohatlamoqchi emasdim, shuning uchun vijdonim toza. Muxlislarning munosabati menga hech qanday ta’sir o‘tkazmaydi.
O‘yinlardan keyin qanday tiklanishi haqida
Har bir o‘yinda 3,2 kilogramm vazn yo‘qotaman. O‘yindan keyin 2,5 litr maxsus tetiklantiruvchi ichimlik ichaman. Bu tezroq tiklanish uchun kerak.
“Real” haqidaHech kim klubdan yuqori bo‘la olmaydi. Nima bo‘lishidan qat’i nazar “Real” mavjud bo‘lib qoladi.
Klub emblemasi va libosi uchun ming bor qon to‘kkan bo‘lardim.
Lionel Messi haqidaArgentinaning eng yaxshi futbolchisi — Lionel Messi. U Diyego Maradonani ortda qoldirgan. Leo ajoyib va betakror futbolchi. Yillar davomida undan aziyat chekdik. Agar Messi “Barselona” tarkibida bo‘lmaganida, ko‘proq sovrinlar qo‘lga kiritishimiz mumkin edi.
Kumirlari haqida
Shunday futbolchilar borki, ularning maydon va uning tashqarisidagi xatti-harakatlari kishini ilhomlantiradi. Bolaligimda Paolo Maldini, Fernando Yerro, keyinchalik esa Karles Puyolning harakatlaridan hayratlanganman.
VAR haqida
Videotakrorlar tarafdoriman. O‘yindan tashqari holatdan gol urib, g‘alaba qozonib bo‘lmaydi. Nohaq belgilangan penalti bilan ham. Bu borada ushbu tizim yordam berishi mumkin. To‘liq va to‘g‘ri foydalanishni o‘rganib bo‘lganimizdan keyin jarayon tezlashadi.
Maqsadi haqida
Maqsadim — otamning ko‘zidagi g‘ururni ko‘rish.
Gollarini kimga bag‘ishlashi haqidaMarkaziy himoyachi uchun ko‘p gol uraman. Har bir golimni menga aziz insonlarga bag‘ishlayman.
Omad haqida
Omad har kuni mehnat qilishga odatlangan, borini ishga bag‘ishlaganlarga kulib boqadi. Siz biladigan va sevadigan Serxio Ramos bo‘lish uchun ko‘p narsani qurbon qilishimga to‘g‘ri kelgan. Avvalo — bolaligimni.
Oilasi haqida
Men uchun oila birinchi o‘rinda turadi. Oilamga hech kim bilmaydigan tomonlarim ma’lum. Oilam va do‘stlarim yonimda bo‘lsa, o‘zimni baxtli his qilaman. Ular bilan quvonchni baham ko‘rishdan yaxshiroq narsa yo‘q.
Taslim bo‘lmaslik haqida
Tajribam shuni ko‘rsatadiki, hech qanday holatda taslim bo‘lmaslik kerak. Xotirjamlikni saqlashimiz va ishlashda davom etishimiz lozim.
Qo‘pol o‘ynashi haqidaMaydonda raqiblarimga qarshi juda qattiq o‘ynay olaman. Oyog‘imni yashirmayman, to‘qnashuvlardan qo‘rqmayman. Lekin negadir hakamlarda men haqimda g‘alat fikr bor. Ular boshqa o‘yinchilarga hatto og‘zaki ogohlantirish berilmaydigan joyda Ramosga kartochka ko‘rsataveradi.
“Oltin to‘p” haqida
Faoliyatim davomida juda ko‘p yutuqlarga erishdim va agar ular meni “Oltin to‘p” bilan taqdirlashsa, bu tarixiy lahza bo‘lardi.
Hakamlik haqida
Hakamlik haqida qancha ko‘p gapirsak, u shunchalik yomonlashib boraveradi.
Tanqidlar haqida
Hammaga hurmat bilan qarayman va har qanday tanqidni qabul qilaman — bu meni yanada kuchliroq qiladi, oldinga yurishimga turtki bo‘ladi.
Izoh (0)