Агар Жанубий Осетия (қисман тан олинган республика) Россия Федерацияси таркибига қўшилса, Шимолий Осетия билан бирлашиб, Россиянинг ягона субъектига айланиши мумкин, деди республика президенти Анатолий Бибилов.
«Биз ташлашимиз керак бўлган ҳуқуқий қадамлар бор. Федерациянинг бир қисмига айланган пайтимизда, Россия Федерацияси ичида субъектларни бирлаштириш билан боғлиқ процедуралар бўлади», — деди Бибилов «Россия 24» телеканалига берган интервьюсида.
«Жанубий Осетия Россия Федерацияси таркибига Россия субъекти сифатида кириши мумкин. Менимча, Осетияни бирлаштириш зарур», — таъкидлади Бибилов.
Маълумот учун Шимолий Осетия— Россия Федерацияси таркибидаги республика.
«Кўпчилик раҳбар, ягона субъектнинг президенти ким бўлишини, ҳукумат қаерда бўлишини гапирмоқда – бу техник масалалар, уларни ҳал қилса бўлади ва бу қарорлар муайян куч тузилмаларининг жойлашуви нуқтаи назаридан мутлақо тўғри бўлиши мумкин», — деди Бибилов. У «Осетия, шубҳасиз, бирлашиши кераклигини» яна бир бор таъкидлади.
«Жанубий Осетия Россия Федерациясига қўшилиш учун қандай қонуний чораларни кўриши керак», деган саволга Бибилов шундай жавоб берди: «Бу қарор республика аҳолиси учун ҳаётий аҳамиятга эга. Бошқа барча қарорлар конституцияда кўрсатилган. Албатта, бунинг учун реферундум ўтказиш, халқнинг фикрини сўраш керак бўлади».
30 март куни Бибилов Жанубий Осетия Россияга қўшилишни режалаштираётгани ҳақида маълум қилди. «Россия билан бирлашиш бизнинг стратегик мақсадимиз, деб ҳисоблайман. Бизнинг йўл. Одамларнинг интилишлари. Ва биз бу йўлдан борамиз. Яқин кунларда тегишли қонуний чоралар кўрамиз. Жанубий Осетия республикаси ўзининг тарихий ватани – Россиянинг бир қисми бўлади», — деди Бибилов.
Ўзини ўзи республика деб эълон қилган Луганск раҳбари Леонид Пасечник 27 март куни яқин орада республикада Россия таркибига қўшилиш бўйича референдум ўтказилишини маълум қилганди. Кейинроқ у ҳозир ҳеч ким референдумга тайёргарлик кўрмаётгани, чунки асосий мақсад «урушни тугатиш» экани ҳақида баёнот берди.
29 март куни Донецк раҳбари Денис Пушилин ҳам Россияга қўшилиш масаласи кўриб чиқилиши ҳақида маълум қилди. «Аммо ҳозир асосий вазифа республиканинг конституциявий чегараларига етиб боришдир. Қарорни кейин қабул қиламиз», — дея қўшимча қилди Пушилин.
Абхазия парламент спикери Валерий Кварчия эса республика Россия таркибига кирмоқчи эмаслигини айтди. «Абхазиянинг Россия Федерацияси таркибига қўшилиши ҳақида гап йўқ. Абхазия конституциясида мамлакатимиз мустақил давлат деб эълон қилинган», — дея унинг сўзларидан иқтибос келтирган «Интерфакс».
Изоҳ (0)