Davlat xavfsizlik xizmati qator viloyatlarda yer maydonlarini noqonuniy sotish holatlariga chek qo‘ydi, deb xabar beradi O‘zA.
Xususan, Samarqand shahrida yashovchi, 34 yoshli fuqaro 2015-yilda mahalliy MCHJga issiqxona qurishi uchun shahar hududidan ajratilgan 50 sotix yer maydoniga nisbatan egalik huquqini xaridor nomiga rasmiylashtirib berish evaziga, undan 60 ming dollar talab qilib, oldindan 20 ming dollar olgan vaqtida Davlat xavfsizlik xizmati va Iqtisodiy jinoyatlarga qarshi kurashish Departamentining hududiy boshqarmalari xodimlari tomonidan ushlangan.
Shuningdek, ushbu noqonuniy ishga aloqador bo‘lgan mazkur MCHJ ta’sischisi ham qo‘lga olingan.
Ishtixon tumanida yashovchi, 25 yoshli fuqaro esa bog‘dorchilikka ixtisoslashgan fermer xo‘jalikning ish boshqaruvchisi bilan kelishgan holda, mazkur xo‘jalikning 8,5 gektar lalmi yer maydonini xaridor nomiga rasmiylashtirib berish evaziga, undan 84 million so‘m olgan vaqtida ushlangan.
Toshkent viloyatining Bekobod tumanidagi meva va sabzavotlarni qadoqlashga ixtisoslashgan MCHJ rahbari 21 sotix yer maydonini tegishli tashkilotlardagi tanishlari orqali xaridor nomiga rasmiylashtirib berish evaziga 24 ming dollar olgan vaqtida qo‘lga olingan.
Toshkent viloyatining Yangiyo‘l tumanida yashovchi 40 yoshli fuqaro o‘zganing ishonchiga kirib, Toshkent shahar Sergeli tumani hududidan mahalliy MCHJga ijara asosida berilgan 2,5 gektar yer maydonini mansabdor tanishlari orqali uning nomiga rasmiylashtirib berish evaziga 1,9 million dollar talab qilib, 12 ming dollarni avans sifatida olgan vaqtida DXX Toshkent shahar boshqarmasi va departament xodimlari tomonidan ushlangan.
Xorazm viloyatining Yangiariq tumanida yashovchi fuqaro (1980-yilda tug‘ilgan) o‘zganing ishonchiga kirib, unga o‘zini go‘yoki Qoraqalpog‘iston Respublikasi Beruniy tumanida faoliyat yurituvchi baliqchilikka ixtisoslashgan fermer xo‘jalikning rahbari sifatida tanishtirgani aniqlangan. U ushbu xo‘jalikning 244 gektar yer maydonini yuqori lavozimdagi tanishlari yordamida auksion savdolari orqali uning nomiga rasmiylashtirib berishni va’da qilgan. Evaziga 250 million so‘m olgan vaqtida DXXning Qoraqalpog‘iston Respublikasi bo‘yicha boshqarmasi va Bosh prokuratura huzuridagi departamentning hududiy boshqarmasi xodimlari tomonidan ushlangan.
Sirdaryo viloyati Xovos tumanidagi fermer xo‘jalik rahbari 15 gektar yer maydonini 38 ming dollarga sotishga kelishib, xaridordan avans sifatida 10 ming dollar olgan vaqtida, boshqa holatda esa muqaddam sudlangan ikki fuqaro (1971 va 1989-yillarda tug‘ilgan) Yangiyer shahri hududidagi 3 gektar yerni tadbirkorlik bilan shug‘ullanmoqchi bo‘lgan shaxs nomiga rasmiylashtirib berish evaziga 9 ming dollar olgan vaqtlarida ushlangan.
Hozirda barcha holatlar yuzasidan jinoyat ishlari qo‘zg‘atilgan.
Avvalroq Xorazmda issiqxona qurish uchun bankdan 2 mln dollar kredit ajratib berish evaziga 80 ming dollar olgan shaxslar ushlangani, Buxoro va To‘rtko‘lda yer sotmoqchi bo‘lgan kadastr sobiq mutaxassisi hamda fuqaro qo‘lga olingani, O‘zbekistonning uchta hududida noqonuniy yer olib berish uchun jami 10 ming dollar va 120 mln so‘m olgan shaxslar ushlangani to‘g‘risida xabar berilgandi.
Izoh (0)