Ijtimoiy tarmoqlarda Damas avtomobilining eshigi uzilib tushgani, bunga UzAuto Motors aybdor qilib ko‘rsatilgani haqida videolavha tarqaldi. Kompaniya holatga munosabat bildirdi.
Qayd etilishicha, UzAuto Motors yuz bergan hodisani batafsil o‘rganish uchun tekshirish ishlari olib borgan. Natijada Damas avtomobili yo‘lovchini manzilda qoldirgandan so‘ng, avtomobil eshigini yopmasdan turib harakatlanishni boshlagani aniqlangan. Ehtiyotkorsizlik sabab yo‘l chetida turgan Nexia avtomobilining bamperiga urilib, yo‘l-transport hodisasi sodir etgan.
Kompaniya fuqarolardan asossiz xabar tarqatmaslikni, mijozlardan bu kabi tekshirilmagan ma’lumotlarga ishonmaslikni so‘rab, tuhmat, yolg‘on, uydirma axborotlarni tarqatganlik uchun javobgarlik belgilanganini eslatib o‘tgan.
Avvalroq O‘zbekistonda ishlab chiqarish o‘sib borayotganiga qaramay, navbatlar undanda tez o‘sayotgani, natijada Cobalt va Lacetti avtomobillari yetishmayotgani haqida xabar berilgan edi. Kompaniya bosh direktori Bo Andersson bu masala ustida kecha-yu kunduz ishlanayotganini va xaridorlar orasida talabgir bo‘lgan avtomobillar ko‘proq ishlab chiqarilayotganini aytgandi. Uning qayd etishicha, Spark avtomobilini xarid qilganlar katta ehtimol bilan avtomobilni shartnomada ko‘rsatilgan muddatdan oldin olishlari mumkin bo‘ladi, Nexia avtomobilini esa, hech qanday kutishlarsiz dilerlardan olib ketishlari mumkin.
Izoh (0)