28-mart kuni bosh vazir o‘rinbosari — investitsiyalar va tashqi savdo vaziri Sardor Umurzoqov rahbarligida tashqi savdo faoliyatining bugungi holati va uni rag‘batlantirish bo‘yicha navbatdagi chora-tadbirlarni muhokama qilishga bag‘ishlangan yig‘ilish bo‘lib o‘tdi. Bu haqda Investitsiyalar va tashqi savdo vazirligi matbuot xizmati xabar berdi.
Yig‘ilishda tegishli vazirliklar, idoralar, tarmoq birlashmalari, tijorat banklari hamda Qoraqalpog‘iston Respublikasi, viloyatlar va Toshkent shahrining mahalliy hokimiyat organlari rahbarlari ishtirok etgan.
Mutasaddi rahbarlar tarmoqlar va hududlar kesimida eksport faoliyatining bugungi holati, mahalliy ishlab chiqaruvchilar va eksportchilarni qo‘llab-quvvatlash bo‘yicha ko‘rilayotgan chora-tadbirlar hamda bu borada mavjud muammolar yuzasidan hisobot bergan. Tadbirkorlar va eksportchilar muammolarini hal qilishda ularni qo‘llab-quvvatlash bo‘yicha olib borilayotgan ishlarning sustligi tufayli alohida rahbarlar faoliyati qattiq tanqid qilingan.
Jumladan, Qoraqalpog‘iston Respublikasi, Andijon, Buxoro, Jizzax, Qashqadaryo, Navoiy, Namangan, Samarqand, Sirdaryo, Toshkent, Farg‘ona, Xorazm viloyatlarining tuman va shaharlari hokimlarining 31 nafar o‘rinbosari, shuningdek, “O‘zto‘qimachiliksanoat” hamda “O‘zsanoatqurilishmateriallari” uyushmalari kabi tarmoq birlashmalari rahbarlari intizomiy javobgarlikka tortilgan.
Shuningdek, mamlakat eksport salohiyatini yuksaltirish, yangi istiqbolli bozorlarni kashf etish hamda eksportga yetkazib berish yo‘nalishlarini diversifikatsiya qilish uchun yangi zaxira va imkoniyatlarni aniqlash hamda safarbar qilish bo‘yicha tizimli ishlarni davom ettirish zarurligi ta’kidlangan.
Yig‘ilish yakunida vazirliklar, idoralar, tijorat banklari va mahalliy hokimliklar rahbarlariga berilgan vazifalar ijrosi yuzasidan qo‘shimcha manzilli topshiriqlar berilgan. Ularning o‘z vaqtida bajarilishini nazorat qilish Bosh prokuratura tomonidan amalga oshiriladi.
Eslatib o‘tamiz, 16-mart kuni Davlat soliq qo‘mitasiga tashrif buyurgan prezident Shavkat Mirziyoyev tadbirkorlarni sindirishga hech kimga hech qachon ruxsat bermasligini ta’kidlagandi. “Hozircha bizda hech kimda tahlil yo‘q. Hamma narsani bir xil bajaramiz. Menga unday bajarish kerak emas. Menga adolatli bajarish kerak, insofli bajarish kerak. Men endi-endi shu besh yilda tadbirkorlarni oyoqqa qo‘yyapman, ularni sindirishga hech kimga hech qachon ruxsat bermayman”, – degan edi davlat rahbari.
Izoh (0)