Давлат хавфсизлик хизмати қатор вилоятларда ер майдонларини ноқонуний сотиш ҳолатларига чек қўйди, деб хабар беради ЎзА.
Хусусан, Самарқанд шаҳрида яшовчи, 34 ёшли фуқаро 2015 йилда маҳаллий МЧЖга иссиқхона қуриши учун шаҳар ҳудудидан ажратилган 50 сотих ер майдонига нисбатан эгалик ҳуқуқини харидор номига расмийлаштириб бериш эвазига, ундан 60 минг доллар талаб қилиб, олдиндан 20 минг доллар олган вақтида Давлат хавфсизлик хизмати ва Иқтисодий жиноятларга қарши курашиш Департаментининг ҳудудий бошқармалари ходимлари томонидан ушланган.
Шунингдек, ушбу ноқонуний ишга алоқадор бўлган мазкур МЧЖ таъсисчиси ҳам қўлга олинган.
Иштихон туманида яшовчи, 25 ёшли фуқаро эса боғдорчиликка ихтисослашган фермер хўжаликнинг иш бошқарувчиси билан келишган ҳолда, мазкур хўжаликнинг 8,5 гектар лалми ер майдонини харидор номига расмийлаштириб бериш эвазига, ундан 84 миллион сўм олган вақтида ушланган.
Тошкент вилоятининг Бекобод туманидаги мева ва сабзавотларни қадоқлашга ихтисослашган МЧЖ раҳбари 21 сотих ер майдонини тегишли ташкилотлардаги танишлари орқали харидор номига расмийлаштириб бериш эвазига 24 минг доллар олган вақтида қўлга олинган.
Тошкент вилоятининг Янгийўл туманида яшовчи 40 ёшли фуқаро ўзганинг ишончига кириб, Тошкент шаҳар Сергели тумани ҳудудидан маҳаллий МЧЖга ижара асосида берилган 2,5 гектар ер майдонини мансабдор танишлари орқали унинг номига расмийлаштириб бериш эвазига 1,9 миллион доллар талаб қилиб, 12 минг долларни аванс сифатида олган вақтида ДХХ Тошкент шаҳар бошқармаси ва департамент ходимлари томонидан ушланган.
Хоразм вилоятининг Янгиариқ туманида яшовчи фуқаро (1980 йилда туғилган) ўзганинг ишончига кириб, унга ўзини гўёки Қорақалпоғистон Республикаси Беруний туманида фаолият юритувчи балиқчиликка ихтисослашган фермер хўжаликнинг раҳбари сифатида таништиргани аниқланган. У ушбу хўжаликнинг 244 гектар ер майдонини юқори лавозимдаги танишлари ёрдамида аукцион савдолари орқали унинг номига расмийлаштириб беришни ваъда қилган. Эвазига 250 миллион сўм олган вақтида ДХХнинг Қорақалпоғистон Республикаси бўйича бошқармаси ва Бош прокуратура ҳузуридаги департаментнинг ҳудудий бошқармаси ходимлари томонидан ушланган.
Сирдарё вилояти Ховос туманидаги фермер хўжалик раҳбари 15 гектар ер майдонини 38 минг долларга сотишга келишиб, харидордан аванс сифатида 10 минг доллар олган вақтида, бошқа ҳолатда эса муқаддам судланган икки фуқаро (1971 ва 1989 йилларда туғилган) Янгиер шаҳри ҳудудидаги 3 гектар ерни тадбиркорлик билан шуғулланмоқчи бўлган шахс номига расмийлаштириб бериш эвазига 9 минг доллар олган вақтларида ушланган.
Ҳозирда барча ҳолатлар юзасидан жиноят ишлари қўзғатилган.
Аввалроқ Хоразмда иссиқхона қуриш учун банкдан 2 млн доллар кредит ажратиб бериш эвазига 80 минг доллар олган шахслар ушлангани, Бухоро ва Тўрткўлда ер сотмоқчи бўлган кадастр собиқ мутахассиси ҳамда фуқаро қўлга олингани, Ўзбекистоннинг учта ҳудудида ноқонуний ер олиб бериш учун жами 10 минг доллар ва 120 млн сўм олган шахслар ушлангани тўғрисида хабар берилганди.
Изоҳ (0)